Лінкі ўнівэрсальнага доступу

Эўразьвяз пачаў перафарматаваньне Усходняга партнэрства


Міністар замежных спраў Беларусі Ўладзімер Макей (трэці зьлева) на саміце Усходняга партнэрства ў Брусэлі разам эстонскім прэм'ерам Юры Ратасам, кіраўнікамі Эўрапейскай Рады Дональдам Тускам і Эўракамісіі Жанам-Клёдам Юнкерам, 24 лістапада 2017

Цяпер у сустрэчах па інтэграцыі ў рамках праграмы Эўразьвязу «Ўсходняе партнэрства» будуць удзельнічаць ня толькі палітыкі, але і прадстаўнікі бізнэсу, фінансавых установаў, няўрадавых і моладзевых арганізацыяў.

Да такога рашэньня прыйшлі прадстаўнікі дзяржаў-чальцоў Эўразьвязу і шасьці краін «Усходняга партнэрства»: Азэрбайджану, Армэніі, Беларусі, Грузіі, Малдовы і Ўкраіны на сустрэчы 13 сакавіка ў Брусэлі. Беларусь тут прадстаўляў намесьнік міністра замежных справаў Алег Краўчанка.

Удзельнікі брусэльскай сустрэчы вызначылі адмысловыя плятформы для супрацы. Гэта — эканоміка, кіраваньне, транспарт, энэргетыка, навакольнае асяродзьдзе і клімат, а таксама сацыяльныя пытаньні.

«Сёньня мы афіцыйна ствараем новую структуру для „Усходняга партнэрства“. Цяпер самае галоўнае — даць праграме новы імпульс і аднавіць нашу сумесную прыхільнасьць да рэформаў у краінах-партнэрах», — сказаў камісар Эўразьвязу ў пытаньнях пашырэньня і добрасуседзтва ЭЗ Яганэс Ган.

Ён спадзяецца, што першыя вынікі рэфармаваньня будуць бачныя ўжо сёлета ўвосень.

Палітоляг: «Усходняе партнэрства» фактычна вяртаецца да беларускіх прапановаў

Кіраўнік экспэртнай ініцыятывы «Менскі дыялёг» Яўген Прэйгерман у камэнтары Свабодзе адзначыў, што перабудова «Ўсходняга пратнэрства» ёсьць канкрэтным ажыцьцяўленьнем стратэгічнай праграмы «20 канкрэтных і практыкаарыентаваных мэтаў да 2020 году». Менавіта такі дакумэнт прынялі ўдзельнікі апошняга саміту «Усходняга партнэрства» у Бруселі мінулагодняй восеньню.

Яўген Прэйгерман
Яўген Прэйгерман

«Усе бачылі, што „Усходняе партнэрства“ год за годам губляла свае, я сказаў бы, візыянэрска-палітычныя імпульсы. І патрэбна было нешта мяняць, каб не загубіць праект цалкам. Былі нават прапановы разьдзяліць шасьцёрку на дзьве групы: Грузія, Малдова, Украіна, якія ўжо маюць асацыяцыйныя пагадненьні з ЭЗ, — гэта адно. А Азэрбайджан, Армэнія, Беларусь — гэта іншае. Але рэфармаваньне, якое пачалося, мабыць, зможа задаволіць усіх, альбо амаль усіх, за выключэньнем Украіны» — лічыць палітоляг.

На думку Яўгена Прэйгермана, пры рэфармаваньні праграмы «Усходняга партнэрства» Беларусь будзе адчуваць сябе ў ёй больш утульна.

«Перамены адпавядаюць канцэптуальным падыходам афіцыйнага Менску. Цяпер у праекце значна больш прагматыкі, эканомікі. То бок ідзе пераход на тыя арыентыры, якія беларускія ўлады прапаноўвалі ад самага пачатку».

З гісторыі «Усходянга партнэрства»

Праграма стваралася для паглыбленьня супрацы Эўразьвязу і шасьці краін былога СССР. Ідэя праекту была прадстаўленая тагачаснымі міністрамі замежных справаў Польшчы і Швэцыі Радаславам Сікорскім і Карлам Більдтам на Радзе ЭЗ 26 траўня 2008 году.

Першы саміт «Усходняга партнэрства» прайшоў у 2009 годзе ў Празе.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG