Лінкі ўнівэрсальнага доступу

Лукашэнка зьмяніў кіраўніцтва дзяржаўных СМІ, зьняў Якубовіча, Давыдзьку і Казіятку

абноўлена

Зьлева направа: Ігар Луцкі, Іван Эйсмант, Дзьмітры Жук і Аляксандар Лукашэнка
Зьлева направа: Ігар Луцкі, Іван Эйсмант, Дзьмітры Жук і Аляксандар Лукашэнка

Аляксандар Лукашэнка 6 лютага зьмяніў кіраўнікоў Белдзяржтэлерадыёкампаніі, тэлеканалу СТВ і дзяржаўнай газэты «Советская Белоруссия», піша БЕЛТА.

Іван Эйсмант
Іван Эйсмант

Белдзяржтэлерадыёкампанію цяпер узначальвае Іван Эйсмант. Нарадзіўся ў 1977 годзе ў Горадні, атрымаў дыплём юрыста, на тэлевізіі вёў перадачы «Сфэра інтарэсаў», «Зона X», «Навіны», «Панарама» і «Галоўны эфір», быў намесьнікам старшыні «БТ». Муж Натальлі Эйсмант, прэс-сакратаркі Аляксандра Лукашэнкі.

Генадзь Давыдзька
Генадзь Давыдзька

Цяпер ужо былы кіраўнік «БТ» Генадзь Давыдзька (кіраваў кампаніяй з канца 2010 году) зь нядаўняга часу ўзначальвае грамадзкую праўладную арганізацыю «Белая Русь». Паводле Лукашэнкі, гэта «крок у слушным напрамку».

Дзмітры Жук
Дзмітры Жук

Галоўным рэдактарам «Советской Белоруссии» («СБ. Беларусь сегодня») прызначаны Дзьмітры Жук. Нарадзіўся ў 1970 годзе ў вёсцы Леткаўшчына Слуцкага раёну, вучыўся на філфаку БДУ, затым у Акадэміі кіраваньня. Працаваў спачатку настаўнікам, потым на розных пасадах у інфармацыйным цэнтры Нацбанку, затым намесьнікам гендырэктара «Інтэрфакс-Захад», у 1999-2003 гг. узначальваў прэс-службу Лукашэнкі, ад 2003 году кіраваў дзяржаўным інфармагенцтвам БЕЛТА.

Радыё Свабода датэлефанавалася да прызначанага Дзьмітрыя Жука, каб пацікавіцца, ці было рашэньне Аляксандра Лукашэнкі для яго нечаканым, і якія пляны ён мае на новай пасадзе.

«Вы ведаеце, я ў інтэрвію Першаму каналу ўжо адказаў, што бачу для сябе ў галоўных прыярытэтах на гэтай пасадзе, — адказаў Жук. — І пакуль ад нейкіх камэнтароў устрымаюся. Паглядзіце тэлебачаньне, там усё ёсьць, дзякуй…»

Павал Якубовіч
Павал Якубовіч

Былы кіраўнік «Советской Белоруссии» Павал Якубовіч (кіраваў газэтай больш за 22 гады) у лістападзе мінулага году ён быў выбраны старшынём грамадзкай рады пры МУС. Лукашэнка казаў, «у яго там вялікі кавалак працы» і «гэтую працу трэба ўзмацніць».

Павал Якубовіч пра адстаўку: «Гэта цудоўная падзея. Ад сёньня я свабодны чалавек»

Ігар Луцкі
Ігар Луцкі

СТВ узначаліў Ігар Луцкі. Нарадзіўся ў 1972 годзе ў Століне, адвучыўся ў БДУ і Акадэміі кіраваньня, працаваў на розных пасадах у Міністэрстве дзяржаўнай маёмасьці, затым у канцылярыі прэзыдэнта, у апараце Савету Фэдэрацыі прафсаюзаў (на пасадах, зьвязаных зь інфармацыйнымі тэхналёгіямі), па два гады працаваў намесьнікам гендырэктара БЕЛТА і дырэктарам «Новогоа радио», у 2008-2014 гадах — першым намесьнікам гендырэктара БЕЛТА, пасьля — першым намесьнікам міністра інфармацыі.

Юры Казіятка
Юры Казіятка

На якую пасаду пераведзены былы дырэктар СТВ Юры Казіятка (быў на той пасадзе са сьнежня 2005 году), не паведамляецца. На момант публікацыі Казіятка таксама быў сэнатарам у Савеце Рэспублікі.

Таксама не паведамляецца, хто цяпер зойме месца Жука і ўзначаліць БЕЛТА.

У час абвяшчэньня кадравых перастановак Лукашэнка заявіў, што папярэднія кіраўнікі дзяржаўных СМІ «гэта людзі вельмі годныя», «іх нельга згубіць». Паводле Лукашэнкі, і Давыдзька, і Якубовіч «мусяць у СМІ працаваць і супрацоўнічаць з намі», а Давыдзьку «трэба падвышаць статус». Лукашэнка сказаў таксама, што «зьбіраецца разглядзець пытаньне» аб накіраваньні Давыдзькі і Якубовіча ў Савет Рэспублікі (верхняя палата Нацыянальнага Сходу). Пра лёс Казіяткі Лукашэнка не казаў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG