Па словах адвакатаў, цяпер экс-губэрнатара Адэскай вобласьці могуць экстрадзіраваць у Грузію. Абарона мае намер абскардзіць рашэньне ў Канстытуцыйным судзе.
У ліпені 2017 году прэзыдэнт Украіны пазбавіў Саакашвілі ўкраінскага грамадзянства. Падставай для гэтага назвалі тое, што экс-прэзыдэнт Грузіі нібыта падаў недакладную інфармацыю ў заяве на атрыманьне грамадзянства, і не паведаміў аб заведзеных супраць яго крымінальных справах у Грузіі. У верасьні палітык зьвярнуўся ў міграцыйную службу і запытаў статус уцекача. 3 студзеня 2018 году суд у Кіеве адмовіўся прызнаваць палітыка ўцекачом або асобай, якая мае патрэбу ў дадатковай абароне пасьля пазбаўленьня грамадзянства Ўкраіны.
5 студзеня Тбіліскі гарадзкі суд прызнаў вінаватым Саакашвілі ў справе аб злосным перавышэньні паўнамоцтваў на пасадзе прэзыдэнта Грузіі і прысудзіў яго да трох гадоў турмы. Лідэр «Руху новых сіл» лічыць, што ўкраінская ўлада наўмысна паскарае разгляд справы, каб мець фармальныя падставы для экстрадыцыі яго з краіны.