Лінкі ўнівэрсальнага доступу

Саакашвілі абвінаваціў Кіеў і Тбілісі ў змове


Міхэіл Саакашвілі на прэсавай канфэрэнцыі ў Кіеве 5 студзеня 2018 году

Экс-прэзыдэнт Грузіі, лідэр украінскай партыі «Рух новых сіл» Міхэіл Саакашвілі завіў, што ня будзе прасіць палітычнага прытулку.

«Я ніколі не прасіў палітычнага прытулку ва Ўкраіне. Я ва Ўкраіне папрасіў статус асаблівай абароны. Гэта статус, які не дазваляе рабіць нейкія дзеяньні ў дачыненьні да мяне да моманту, пакуль я не вярну сабе ўкраінскае грамадзянства. Я не прасіў, і ня буду прасіць статус палітычнага ўцекача ні ў адной краіне», — кажа Саакашвілі.

Пры гэтым Саакашвілі абвінаваціў у змове супраць яго ўлады Украіны і Грузіі.

«У ліпені мінулага году, знаходзячыся з афіцыйным візытам, прэзыдэнт [Украіны Пятро] Парашэнка сустрэўся ў Батумі з алігархам [Бідзінам] Іванішвілі (былы прэм’ер Грузіі і заснавальнік праўладнай партыі «Грузінская мара» — РС). Яны дамовіліся аб сумесных дзеяньнях супраць мяне. Пасьля гэтага Парашэнка пазбавіў мяне ўкраінскага грамадзянства, а грузіны прысьпешылі суды супраць мяне»,— сказаў Саакашвілі.

Прэзыдэнт Грузіі Георгій Маргвэлашвілі назваў прысуд Міхэілу Саакашвілі «абуральным». (Маргвэлашвілі быў стаўленікам Бідзіны Іванішвілі на пасаду прэзыдэнта, але адразу ж пасьля абраньня пачаў дыстанцыявацца ад яго і ад партыі «Грузінская мара»).

Суд у Тбілісі 5 студзеня завочна асудзіў Міхаіла Саакашвілі на тры гады турэмнага зьняволеньня. Яго прызналі вінаватым па артыкуле «злоўжываньне службовымі паўнамоцтвамі». Справа разглядалася два гады.

Гэта першы прысуд у дачыненьні да палітыка, які дае падставы для яго экстрадыцыі з Украіны ў Грузію.

Прысуд вынесьлі па справе Аляксандра Гіргвэліяні — супрацоўніка «Аб’яднанага банку Грузіі».

Гіргвэліяні быў выкрадзены ў 2006 годзе пасьля сваркі з супрацоўнікам міністэрства ўнутраных справаў у адным з рэстаранаў грузінскай сталіцы. Пазьней ён быў знойдзены мёртвым у яры пад Тбілісі. У тым жа годзе суд прызнаў вінаватым у яго гібелі чатырох супрацоўнікаў МУС, прысудзіўшы іх да турмы тэрмінам ад сямі да васьмі гадоў. Але асуджаныя адседзелі толькі палову тэрміну.

Паводле вэрсіі абвінавачваньня, Саакашвілі спрыяў фальсыфікацыі сьледзтва і незаконна памілаваў забойцаў.

Супраць Міхаіла Саакашвілі ў Грузіі распачалі яшчэ некалькі крымінальных спраў. Яго вінавацяць у арганізацыі зьбіцьця дэпутата і бізнэсмэна Валерыя Гелашвілі, які абразіў ў адным з інтэрвію жонку Саакашвілі, у растраце бюджэтных сродкаў і разгоне пратэстаў у лістападзе 2007 года. Супраць бяззбройных дэманстрантаў ўжываліся гумовыя кулі, хоць у заканадаўстве няма прамога дазволу на іх выкарыстаньне.

Ваша меркаваньне

Паказаць камэнтары

XS
SM
MD
LG