У Гомельскай вобласьці неэфэктыўна выкарыстоўваюцца бюджэтныя сродкі, прызначаныя на пераадоленьне наступстваў катастрофы на Чарнобыльскай АЭС. Такую выснову зрабілі Гомельская абласная пракуратура і рэгіянальны Камітэт дзяржкантролю.
На сумеснай калегіі яны падсумавалі вынікі праверак выкананьня Дзяржаўнай чарнобыльскай праграмы на 2011–2015 гады і на пэрыяд да 2020 году.
Праверкай выяўлены шэраг нерэалізаваных профільных праектаў. Прыкладам, у Веткаўскім раёне ня зроблена рэканструкцыя станцыі абезжалезьваньня пітной вады, не пабудаваныя каналізацыя і ачышчальныя прыстасаваньні.
У Чачэрскім раёне зацягваюць рэканструкцыю інавацыйнай фэрмы для вырошчваньня племяннога пагалоўя сьвіней з цэхам перапрацоўкі.
Органы пракуратуры, адзначана ў паведамленьні, узбудзілі некалькі крымінальных спраў, якія зьвязаныя зь нямэтавым выкарыстаньнем сродкаў пры закупе абсталяваньня для харчовых прадпрыемстваў.
У Брагінскім, Буда-Кашалёўскім, Гомельскім раёнах мелі месца выпадкі вырошчваньня сельгаспрадукцыі на заражаных радыянуклідамі землях без адпаведнага дазымэтрычнага кантролю.
Выяўлены неабгрунтаваныя выплаты дапамогі асобным катэгорыям працаўнікоў, якія накіроўваліся ў чарнобыльскія раёны. Ёсьць факты і несвоечасовых выплатаў такой дапамогі.
Аналіз зьвестак, пададзеных у пракуратуру Гомельскім абласным цэнтрам гігіены, эпідэміялёгіі і грамадзкага здароўя, паказаў, што ў заражаных радыяцыяй раёнах грыбы й ягады, якія зьбірае насельніцтва, правяраюцца надзвычай рэдка. Таму ня выключана, што ў ежу трапляюць «дзікаросы», у якіх утрыманьне радыянуклідаў вышэйшае за дапушчальны ўзровень.
«Радыяцыя нікуды не сышла»
Намесьніца галоўнага дзяржаўнага санітарнага лекара Гомельскай вобласьці па пытаньнях гігіены Сьвятлана Саварына кажа, што ўсе раённыя цэнтры гігіены і эпідэміялёгіі бясплатна правяраюць грыбы й ягады для насельніцтва на наяўнасьць радыянуклідаў цэзію-137, а занальныя цэнтры ў Мазыры й Рэчыцы — яшчэ й на стронцый-90.
«Бяда ў тым, што многія людзі, якія жывуць на забруджаных тэрыторыях, звыкліся з радыяцыяй, ня думаюць пра сваё здароўе і здароўе родных, хоць цэнтры гігіены разам з выканкамамі тлумачаць, папярэджваюць, што грыбы й ягады, а таксама вылаўленую рыбу трэба абавязкова правяраць. Яны па-ранейшаму могуць утрымліваць значна больш радыянуклідаў, чым прадугледжана санітарнымі ўзроўнямі», — кажа Сьвятлана Саварына.
Паводле намесьніцы галоўнага дзяржаўнага санітарнага лекара Гомельшчыны, радыяцыя «нікуды не сышла, не распалася канчаткова». «Нават на адносна „чыстых“ тэрыторыях могуць быць вельмі „брудныя“ плямы», — кажа яна.
Што да суб’ектаў гаспадараньня, то, па словах спэцыялісткі, кожнае прадпрыемства, якое выпускае харчовую прадукцыю альбо сыравіну для яе, абавязана паводле заканадаўства праводзіць радыялягічныя замеры.
