Кіраўнік ведамства Джэф Сэшнс вырашыў адмовіцца ад палітыкі часоў былога прэзыдэнта ЗША Барака Абамы. Тады прадугледжвалася, што фэдэральныя пракуроры не павінны перашкаджаць заканадаўчаму працэсу легалізацыі марыхуаны ў асобных штатах.
«Місія Міністэрства юстыцыі палягае ў забесьпячэньні выкананьня законаў Злучаных Штатаў, а папярэднія крокі падрываюць вяршэнства закону», — цытуе заяву Сэшнса «Нью-Ёрк Таймс».
Ранейшую палітыку адміністрацыі Абамы чыноўнік назваў «непатрэбнай», паколькі, на перакананьне міністра, марыхуана ёсьць небясьпечным наркотыкам, а яе абарачэньне зьяўляецца сур’ёзным злачынствам.
«Прынцып неўмяшаньня» і пры Абаму меў шэраг выключэньняў: так, фэдэральныя ўлады ня мелі права заплюшчваць вочы на ўдзел у гэтым бізнэсе арганізаванай злачыннасьці або на спробы распаўсюджваць наркотык сярод непаўналетніх.
Рашэньне Сэшнса зьявілася праз тры дні пасьля таго, як вытворчасьць, захоўваньне, перавозка і продаж марыхуаны былі легалізаваныя ў Каліфорніі — шостым штаце ЗША, які пайшоў на такі крок. Дагэтуль на такі крок пайшлі Аляска, Каларада, Нэвада, Орэган і Вашынгтон. Чакалася, што сёлета пачнуцца продажы ў Масачусэтсе і Мэне. Усяго 29 штатаў і акруга Калюмбія хоць бы часткова легалізавалі гэтае рэчыва, у тым ліку для выкарыстаньня ў мэдыцыне.
Шэраг губэрнатараў і заканадаўцаў ад абедзьвюх партый раскрытыкавалі рашэньне Міністэрства юстыцыі. Яны адзначылі, што фэдэральныя ўлады не павінны ўмешвацца ў справы штатаў.
