Увечары 11 сьнежня заканчваюцца 72 гадзіны, на працягу якіх па законе павінна быць абраная мера стрыманьня Саакашвілі. Дадзеных пра час правядзеньня паседжаньня няма, пісаў у нядзелю ўвечары на сваёй Facebook-старонцы паплечнік палітыка Давід Сакварэлідзэ.
Міхэіла Саакашвілі затрымалі ў Кіеве вечарам 8 сьнежня на кватэры аднаго зь яго прыхільнікаў, былога галоўнага начальніка паліцыі. Палітыка абвясьцілі ў вышук пасьля таго, як 5 сьнежня яму ўдалося пазьбегнуць затрыманьня.
Паводле Генэральнай пракуратуры Ўкраіны, Саакашвілі падазраюць па артыкуле Крымінальнага кодэкса Ўкраіны аб «садзейнічаньні ўдзельнікам злачынных арганізацый і ўтойваньне іх злачыннай дзейнасьці».
5 сьнежня генэральны пракурор Украіны Юры Луцэнка заявіў, што лідэр партыі «Рух новых сіл» Міхэіл Саакашвілі атрымаў ад бізнэсоўца Сяргея Курчанкі, які хаваецца ў Расеі, паўмільёна даляраў на сваю дзейнасьць ва Ўкраіне. Ён прывёў запіс перахопу гутарак, што, паводле яго слоў, пацьвярджаюць гэта.
Саакашвілі назваў ілжывымі ўсе абвінавачваньні ў свой адрас.
