Лінкі ўнівэрсальнага доступу

«Трымаў мікрафон». Суд аштрафаваў журналіста-фрылансэра за сюжэт для «Белсату»


Андрэй Толчын у судзе, 30 лістапада 2017 году
Андрэй Толчын у судзе, 30 лістапада 2017 году

30 лістапада суд Чыгуначнага раёну Гомля аштрафаваў журналіста-фрылансэра Андрэя Толчына на 25 базавых велічыняў (575 рублёў) за сюжэт на тэлеканале «Белсат» «40 градусаў, пагрозы і вада з прыбіральні».

Напярэдадні той жа судзьдзя Яўген Шаршнёў за гэты ж матэрыял пакараў штрафам у 690 рублёў гомельскага незалежнага журналіста Кастуся Жукоўскага, прызнаўшы яго вінаватым у вырабе і распаўсюдзе сюжэту для польскага спадарожнікавага тэлеканалу «Белсат» без акрэдытацыі ў беларускім МЗС.

Андрэй Толчын патлумачыў, што 3 кастрычніка быў каля прадпрыемства «Каштан», каб абараняць Жукоўскага ад «непісьменных міліцыянтаў, неадэкватных асобаў, якія, бывае, кідаюцца на чалавека зь відэакамэрай». А яшчэ — трымаў мікрафон і вёў перамовы з нарадам міліцыі, які прыехаў да прахадной на выклік ахоўнікаў.

«На відэа бачна, што вы стаіце зь мікрафонам побач з маладым чалавекам. Вы бралі ўдзел у апытаньні?» — пацікавіўся судзьдзя ў Андрэя Толчына.

«Я трымаў мікрафон, але пытаньняў не задаваў, — адказаў Толчын. — Я гутарыў толькі зь міліцыянтамі, тлумачыў, што відэаздымкі робяцца ў грамадзкім месцы — Канстытуцыяй гэта не забараняецца. У мяне няма працоўных дамоваў з аніякімі СМІ — ні зь беларускімі, ні з замежнымі».

Судзьдзя Шаршнёў пагадзіўся, што распаўсюду відэаздымкаў няма. Аднак ёсьць выраб прадукцыі СМІ без акрэдытацыі — Толчын трымаў мікрафон.

«Міліцыя не высьвятляе, ці зьяўляюцца фрылансэры супрацоўнікамі таго ж „Белсату“. Суды гэтая акалічнасьць таксама ня надта цікавіць. Далі штраф — папоўнілі бюджэт. А што на прадпрыемстве, чаго людзі абураюцца — гэта ўжо мала каго цікавіць», — сказаў пасьля прысуду Андрэй Толчын.

Сёлета гэта ўжо пяты штраф фрылансэру Толчыну паводле часткі 2, артыкула 22.9 КаАП. Агулам сума штрафаў склала 3795 рублёў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG