У Беларусі зьмяніліся правілы атрыманьня вышэйшай адукацыі другой ступені. Адпаведныя зьмены ўнесены пастановай ураду № 861 ад 17 лістапада 2017 году.
Цяпер паступаць у магістратуру на вечаровую ці завочную форму навучаньня можна толькі грамадзянам, якія маюць працоўны стаж ня меншы за 10 месяцаў. Улічваецца таксама праца
- па грамадзянска-прававой дамове,
- індывідуальным прадпрымальнікам,
- творчым супрацоўнікам,
- рамесьнікам,
- адвакатам ці натарыюсам.
Конкурс на паступленьне ў магістратуру павінен цяпер праводзіцца па спэцыяльнасьцях ці групах спэцыяльнасьцяў. Абітурыенты, якія паступаюць на вочнае (вечаровае) і завочнае аддзяленьне, цяпер маюць асобныя конкурсы.
Ляўрэаты спэцыяльных фондаў кіраўніка Беларусі змогуць паступаць у магістратуру без іспытаў.
Асобы, якім у Беларусі дадзены прытулак ці статус уцекача, пры паступленьні ў магістратуру маюць такі самы статус, як і грамадзяне Беларусі. Яны могуць удзельнічаць у конкурсе на бюджэтныя месцы ў магістратурах дзяржаўных установаў адукацыі.
Для замежных грамадзян і асобаў без грамадзянства ўдакладнены пералік дакумэнтаў, якія трэба падаць у прыёмную камісію.
Для замежных грамадзян уводзіцца платная гутарка па вучэбных дысцыплінах. На ёй будзе высьвятляцца і ўзровень валоданьня мовай навучаньня. Парадак правядзеньня гутаркі вызначае Міністэрства адукацыі.
