Лінкі ўнівэрсальнага доступу

Сын «народнага футбаліста» Пракапенкі зрабіў фільм пра бацьку і легендарную перамогу менскага «Дынама»


Архіўнае фота. Чарговая галявая атака Аляксандра Пракапенкі
Архіўнае фота. Чарговая галявая атака Аляксандра Пракапенкі

15 лістапада ў менскім комплексе «Фалькон Клюб Буцік Кіно» адбудзецца спэцыяльны паказ дакумэнтальнага фільму «Аляксандар Пракапенка. Народны футбаліст». Рэжысэр — Руслан Газізаў.

У стужцы расказваецца пра легендарнага беларускага спартоўца, гульца менскага «Дынама» і зборнай СССР, які 16 лістапада адзначыў бы свой 64-ы дзень нараджэньня. Акрамя таго, у гэтыя ж дні спаўняецца 35 гадоў перамозе беларускага калектыву ў саюзным чэмпіянаце.

Жыць і гуляць да зьнямогі

Ідэйны натхняльнік праекту — Зьміцер Пракапенка, сын славутага футбаліста. Празь 10 гадоў пасьля сьмерці бацькі яны разам з маці пераехалі ў ЗША, там ён пачаў займацца рэклямнымі праектамі, а таксама ўдзельнічаць у аматарскіх футбольных турнірах. Пры гэтым падтрымлівае сталыя кантакты з дынамаўскім клюбам, арганізуе маркетынгавыя кампаніі. Пра яго Свабода ня так даўно пісала.

«Ягоны футбол ня мог пакінуць абыякавым нікога — без крэатыўнага паўабаронцы цяжка ўявіць перамогу менчукоў у чэмпіянаце СССР 1982 году», — кажа пра бацьку Зьміцер Пракапенка.

Зь сябрамі Юрыем Курненіным і Ігарам Гурыновічам
Зь сябрамі Юрыем Курненіным і Ігарам Гурыновічам

Паводле Зьмітра, акрамя ўнікальных архіўных відэа- і фотадакумэнтаў, у фільм увайшлі ўспаміны пра Аляксандра Пракапенку ягоных родных, жонкі Натальлі, партнэраў па камандзе — Эдуарда Малафеева, Уладзімера Курнева, Анатоля Байдачнага, Сяргея Алейнікава, Аляксандра Аляксейчыкава ды іншых.

Перад паказам упершыню будуць выстаўленыя ўзнагароды Пракапенкі — залаты мэдаль за перамогу ў чэмпіянаце СССР 1982 году і бронзавы — за Алімпіяду-1980. Мастачка Ціяна Банькоўская прадставіць жывапісны партрэт, напісаны да дня нараджэньня легенды беларускага футболу.

Бацька з сынам
Бацька з сынам

Аляксандар Пракапенка пайшоў з жыцьця ў 1989-м, яму было ўсяго 35 гадоў. Майстар спорту міжнароднага клясу, бронзавы прызэр Алімпійскіх гульняў 1980 году, гулец зборнай Савецкага Саюзу, чэмпіён СССР 1982 году, № 1 у сьпісе 33 найлепшых футбалістаў СССР 1982 году.

У 1983-м быў адлічаны з каманды за «сыстэматычнае парушэньне рэжыму», двойчы зьмяшчаўся ў лекава-працоўны прафілякторый. Выступаў за магілёўскі «Дняпро» і бакінскі «Нефтчы», але без ранейшага запалу. Памёр 29 сакавіка 1989-га.

Пахаваны на могілках вёскі Токары Бабруйскага раёну.

Зьміцер Пракапенка на магіле бацькі ў Токарах
Зьміцер Пракапенка на магіле бацькі ў Токарах

Захаваць імгненьні памяці

У 1993 годзе ў Менску прайшоў першы турнір па міні-футболе памяці Аляксандра Пракапенкі.

Ад 2001 году пад эгідай Беларускай асацыяцыі міні-футболу ладзіцца мэмарыял Аляксандра Пракапенкі.

У 2004 годзе «БелСвісБанк» заснаваў прыз імя Аляксандра Пракапенкі «За футбольны талент і самааддачу ў гульні за Беларусь».

У 2015 годзе імем Аляксандра Пракапенка названы стадыён на яго радзіме ў Бабруйску.

У 2017 годзе атрымана папярэдняя згода ад менскіх уладаў аб устаноўцы помніка Аляксандру Пракапенку на тэрыторыі абноўленага стадыёну «Дынама».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG