Лінкі ўнівэрсальнага доступу

Міністэрства абароны: «Беларусі ніхто не праціўнік, але кааліцыя ў нас з Расеяй»


Вучэньні «Захад-2017»

Прадстаўнік Міністэрства абароны Беларусі Ўладзімер Макараў падчас брыфінгу па выніках другога дня вайсковых вучэньняў «Захад-2017» пракамэнтаваў іх сцэнар.

На пытаньне замежнага журналіста, ці пад «дывэрсантамі», супрацьстаяць якім трэніруюцца расейскае і беларускае войскі, маюцца на ўвазе групы «пры падтрымцы Захаду», Уладзімер Макараў адказаў:

«Ёсьць вайсковая дактрына Рэспублікі Беларусі. Рэспубліка Беларусь не разглядае ніводную дзяржаву ў якасьці праціўніка. Мы не разглядаем ніводную зь дзяржаваў Захаду, у тым ліку тыя, якія ўваходзяць у альянс, у якасьці праціўніка. І робім усё для таго, каб праціўнікаў у нас не было і надалей...

Але пры гэтым рэалізуецца кааліцыйная вайсковая палітыка. І яе прыярытэтны кірунак — гэта вайскова-тэхнічная супраца з Расейскай Фэдэрацыяй».

Сцэнар вучэньняў «Захад-2017» часткова раскрыў 12 ліпеня на форуме АБСЭ ў Вене намесьнік кіраўніка генэральнага штабу Ўзброеных сілаў Беларусі генэрал-маёр Павал Муравейка. Паводле яго, на вучэньнях будзе распрацаваная мадэль канфлікту паміж «Паўночнымі» (Беларусь і Расея) і «Заходнімі» (кааліцыя трох дзяржаваў-агрэсараў: Вяйшнорыі, Весбарыі і Лубеніі). Паводле сцэнара, «Заходнія» спрабуюць раскалоць саюз Беларусі і Расеі, пагоршыць сацыяльна-эканамічную абстаноўку ў першай, дамагчыся там зьмены кіраўніцтва і, выкарыстоўваючы ўсё гэта, захапіць частку Беларусі і стварыць там дзяржаву пад назвай «Вяйшнорыя». Пасьля гэтага «Заходнія» зьбіраюцца ўвесьці свае войскі на тэрыторыю ўсёй краіны. «Паўночныя», адпаведна, павінны гэтым плянам супрацьстаяць.

Ваша меркаваньне

Паказаць камэнтары

XS
SM
MD
LG