Лінкі ўнівэрсальнага доступу

Лідэр Каталёніі дамагаецца правядзеньня 1 кастрычніка рэфэрэндуму аб незалежнасьці ад Гішпаніі


Лідэр гішпанскага рэгіёну Каталёнія заявіў, што будзе настойваць на плянах правесьці 1 кастрычніка рэфэрэндум аб незалежнасьці ад Гішпаніі, нягледзячы на ​​абвяшчэньне такіх дзеяньняў незаконнымі з боку цэнтральнага ўраду і судоў.

Кіраўнік ураду Каталёніі Карлес Пудждэмон 10 верасьня абвясьціў, што да рэфэрэндуму «ўсё гатова» і «каталёнцы змогуць галасаваць». Насуперак пратэсту Мадрыду, у Каталёніі надрукавалі выбарчыя бюлетэні, сфармавалі сьпісы выбарнікаў, уладкавалі выбарчыя ўчасткі.

Паводле нядаўняга апытаньня каталёнцаў, 41,1% жыхароў рэгіёну падтрымалі незалежнасьць ад Гішпаніі, 49,9% — выказаліся супраць. Акрамя таго, 70 адсоткаў рэспандэнтаў сказалі, што хочуць, каб пытаньне аб незалежнасьці было ў рэшце рэшт урэгуляванае і зьнікла няпэўнасьць з гэтай нагоды.

Калі большасьць каталёнцаў скажуць на рэфэрэндуме «так», улады рэгіёну паабяцалі абвясьціць незалежнасьць на працягу 48 гадзін.

Рэгіён Каталёнія, недалёка ад мяжы з Францыяй, мае насельніцтва ў 7,5 мільёнаў чалавек. Да рэгіёну належыць вядомы турыстычны горад Барсэлёна. Каталёнія, якая мае статус «аўтаномнай супольнасьці», зьяўляецца часткай Гішпаніі з 15 стагодзьдзя. Аднак многія каталёнцы маюць горкія ўспаміны пра забарону на выкарыстаньне сваёй мовы падчас дыктатуры 1939-1975 гадоў генэрала Франка.

Каталёнцы спрабуюць здабыць незалежнасьць ад Гішпаніі прынамсі з пачатку XX стагодзьдзя.

Ваша меркаваньне

Паказаць камэнтары

XS
SM
MD
LG