Беларусам, якія сплацілі «збор на фінансаваньне дзяржаўных выдаткаў» за 2015 год, пачалі вяртаць грошы, заявіла БЕЛТА намесьніца міністра падаткаў і збораў Сьвятлана Шаўчэнка.
Умова вяртаньня «падатку на дармаедаў», паводле Шаўчэнкі, адна: каб чалавек знайшоў сабе афіцыйную працу і прыступіў да яе. Колькі такіх ужо знайшлося, намесьніца міністра ня ведала.
Рашэньне, паводле Шаўчэнкі, было прынятае на нарадзе ў Аляксандра Лукашэнкі 9 сакавіка і толькі пачало выконвацца. Там жа «былі выразна пазначаныя ўсе асноўныя кірункі работы па дэкрэце № 3, расстаўленыя прыярытэты».
Краіна дармаедаў: гісторыі
Аляксандар Лукашэнка падпісаў дэкрэт № 3, які ўкараніў «падатак на дармаедаў», 2 красавіка 2015 году. Тым, хто не плаціў падаткі са сваёй працы больш за 183 дні на год, была прызначаная выплата ў 20 базавых велічыняў (летась гэта складала 360 рублёў).
Ды беларусы не захацелі плаціць збор за 2015 год — апошні дзень сплаты доўга адкладалі, урэшце збор сплацілі ненашмат больш за 50 тысяч з 470 тысяч атрымальнікаў «лістоў шчасьця». «Падатак на дармаедаў» справакаваў таксама масавыя акцыі пратэсту ў многіх гарадах Беларусі і абурэньне міжнароднай супольнасьці гэтым зборам як элемэнтам прымусу да працы.
Урэшце ў сакавіку Аляксандар Лукашэнка загадаў не спаганяць «падатак на дармаедзтва» да канца году, але не скасаваў сам збор. «Дармаедам», якія сплацілі збор, спачатку не плянавалі яго вяртаць: яго «пакінулі на рахунку» да наступнай сплаты збору на выпадак, калі чалавек зноў стане «дармаедам».
Шмат чаго засталося незразумела: улады так і не сказалі, колькі чалавек не сплацілі збор; не пакаралі вінаватых у народным абурэньні, якіх крытыкаваў Лукашэнка; не растлумачылі, на якое такое «ўтрыманьне дзяцей» (як казаў Лукашэнка) пойдуць ужо сабраныя грошы.
Заданьне Лукашэнкі «працаўладкаваць усіх беспрацоўных да 1 траўня» было праваленае: у краіне па-ранейшаму каля 40 тысяч афіцыйных беспрацоўных і каля 260 тысяч «рэальных» беспрацоўных. Менскія службы занятасьці спрабавалі пісаць лісты «дармаедам», але на іх адказала толькі каля 0,3% адрасатаў.
