Лінкі ўнівэрсальнага доступу

Лукашэнка «гарантуе» бясьпечную АЭС і заклікае літоўцаў далучыцца да будоўлі


«Я гарантую вам, эўрапейцам, нягледзячы на тое, што мы не адзіныя, хто займаецца мірным атамам, мы пабудуем самую бясьпечную электрастанцыю, — заявіў 5 ліпеня Аляксандар Лукашэнка, выступаючы на сэсіі Парлямэнцкай асамблеі АБСЭ ў Менску. — У нас, у чарнобыльскай рэспубліцы, пасьля аварыі на Чарнобыльскай АЭС ня так проста было прыняць гэтае рашэньне. І мы разумеем, што галоўнае пытаньне — пытаньне бясьпекі, — падкрэсьліў Лукашэнка.

Лукашэнка адзначыў, што Беларусь зьбіраецца завяршыць будаўніцтва Астравецкай АЭС у тэрмін «зь няўхільным выкананьнем нормаў і стандартаў МАГАТЭ».

Паводле кіраўніка Беларусі, ён «нармальна ўспрымае» тое, што Літоўская Рэспубліка часта падымае пытаньне бясьпекі БелАЭС.

«Я нядаўна літоўцам прапанаваў: ну колькі мы будзем сварыцца з-за гэтай станцыі? Давайце разам яе пабудуем і будзем разам эксплюатаваць як беларуска-літоўскую станцыю. Каб яна забясьпечвала электраэнэргіяй і Беларусь, і Літву, і, калі трэба, Латвію, Эстонію, Польшчу і іншыя дзяржавы. Гэта ж самы танны від электраэнэргіі», — сказаў ён.

«Давайце разам сядзем, разьбяромся. Здымем гэтае пытаньне і ня будзем сьмяшыць увесь сьвет. Нам — Літве і Беларусі — патрэбная гэтая станцыя», — заявіў Лукашэнка.

Ён нагадаў, што ў Літве доўга функцыянавала Ігналінская АЭС, працэс вываду якой з эксплюатацыі працягваецца дагэтуль. Беларусь ніколі не падымала пытаньня пра яе бясьпеку, хоць атрымлівала ад «гэтай старой станцыі шмат нэгатыўных працэсаў». «Ваду для астуджэньня гэтая станцыя атрымлівала зь Беларусі. І скід адпрацаванай вады ішоў таксама ў Беларусь. Мы разумелі, трэба час, каб вырашыць гэтае пытаньне», — сказаў кіраўнік Беларусі.

15 чэрвеня 2017 году парлямэнт Літвы прыняў закон, паводле якога атамная электрастанцыя, якая будуецца ў Астравецкім раёне Беларусі, уяўляе пагрозу нацыянальнай бясьпецы Літоўскай Рэспублікі, яе навакольнаму асяродзьдзю і грамадзкаму здароўю.

  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

Ваша меркаваньне

Паказаць камэнтары

XS
SM
MD
LG