Лінкі ўнівэрсальнага доступу

Магілёўскі суд пакараў журналіста за супрацоўніцтва зь беластоцкай газэтай «Ніва»


Уладзімер Лапцэвіч
Уладзімер Лапцэвіч

Ленінскі суд Магілёва пакараў журналіста Ўладзімера Лапцэвіча за супрацоўніцтва з газэтай беларусаў Польшчы «Ніва» на 45 базавых велічыняў (1035 рублёў). Судзьдзя Алена Літвіна прызнала яго вінаватым у вырабе прадукцыі сродку масавай інфармацыі без акрэдытацыі.

На пазаштатнага карэспандэнта інфармацыйнай кампаніі «БелаПАН» Ленінскі аддзел міліцыі Магілёва склаў 7 пратаколаў аб парушэньні ім закону «Аб сродках масавай інфармацыі». Падставай для адміністрацыйнага перасьледу сталіся зьвесткі з падатковай інспэкцыі, што Ўладзімер Лапцэвіч плаціць падатак за ганарары, атрыманыя з газэты «Ніва».

«Гэта спроба ўціску і перасьледу мяне як журналіста ў Беларусі», — пракамэнтаваў рашэньне судзьдзі Літвіной Уладзімер Лапцэвіч. Ён назваў прысуд глупствам, якое, паводле яго, праваахоўныя органы пачалі з ініцыятывы Камітэту дзяржаўнай бясьпекі.

«Наўрад ці ва Ўпраўленьні ўнутраных спраў ведаюць пра тыднёвік беларусаў Польшчы „Ніва“, — сказаў ён.— Большага глупства з боку нашай дзяржавы, чым забараняць чалавеку распаўсюджваць інфармацыю, уявіць цяжка».

Сваёй віны журналіст не прызнаў. Прасіў суд спыніць працэс з прычыны адсутнасьці ў ягоных дзеяньнях правапарушэньня. Падаў даведку, якою рэдакцыя газэты «Ніва» інфармавала, што ня мае зь ім працоўнай дамовы і што ён не карэспандэнт выданьня.

Лапцэвіч казаў, што дасылаў у замежную газэту лісты з аглядам беларускага інтэрнэту, і рэдакцыя выданьня сама вырашала, ці публікаваць іх.

Мне спрабуюць забараніць распаўсюджваць інфармацыю.

«Мне спрабуюць забараніць распаўсюджваць інфармацыю, — казаў ён на судзе, — нягледзячы на тое, што права на распаўсюд інфармацыі мне гарантавана законам і ратыфікаванымі Беларусьсю міжнароднымі прававымі актамі».

Журналіст вінаваціў міліцыянтаў, што яны, распачаўшы супраць яго адміністрацыйны перасьлед, праігнаравалі норму, закладзеную ў закон аб СМІ, паводле якой журналіст ня можа вырабляць прадукцыі СМІ, бо гэта прэрагатыва рэдакцыі выданьня як юрыдычнай асобы.

«Пісаць лісты ў замежныя выданьні — станоўчы момант для Рэспублікі Беларусь, асабліва калі гэта тычыцца выданьня беларускай нацыянальнай меншасьці ў Польшчы, — казаў суду Ўладзімер Лапцэвіч. — З маіх лістоў беларусы Польшчы знаёміліся зь беларускім інтэрнэтам, бачылі жыцьцё ў Беларусі вачыма тутэйшага беларуса. Калі ня будзе аўтараў, якія пішуць у газэту „Ніва“, то выданьне зьнікне. Такім чынам могуць зьнікнуць і беларусы ў Польшчы. Гэта дужа важны зьнешнепалітычны момант, таму дзеяньні супрацоўнікаў міліцыі ня проста бессэнсоўныя ў жаданьні мяне пакараць, але яны супярэчаць палітыцы нашай дзяржавы, скіраванай на падтрыманьне беларусамі сваіх суайчыньнікаў у Польшчы».

За час, пакуль міліцыянты зьбіралі зьвесткі супраць журналіста, справа прыпынялася. У пастанове аб прыпыненьні справы адзначаецца, што «неабходна ўстанавіць, ці зьвязаны працоўнымі адносінамі з рэдакцыяй замежнага сродку масавай інфармацыі Лапцэвіч, бо гэта ёсьць абавязковай прыкметай правапарушэньня». Урэшце сьведчаньнем наяўнасьці гэтай прыкметы суд прызнаў падатковую дэклярацыю журналіста.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG