Лінкі ўнівэрсальнага доступу

Францыя: прыхільнікі Макрона атрымалі большасьць у парлямэнце


Прэзыдэнт Францыі Эманюэль Макрон галасуе на парлямэнцкіх выбарах, 18 чэрвеня 2017 году

Рух прэзыдэнта Францыі Эманюэля Макрона «Наперад, Рэспубліка!» атрымаў перамогу ў другім туры парлямэнцкіх выбараў. Як паведамляе выданьне Le Monde, прыхільнікі Макрона ды іхныя саюзьнікі атрымаюць у Нацыянальнай асамблеі каля 350 месцаў — з 577.

У цэлым па краіне за рух Макрона прагаласавалі больш за 40 працэнтаў французаў, за правую партыю «Рэспубліканцы» — прыкладна ўдвая менш.

У «Рэспубліканцаў» будзе крыху больш за 100 месцаў у парлямэнце. У Сацыялістычнай партыі, якой раней належала большасьць — каля 30. Прыкладна столькі ж ва ультралевых — руху «Непакорлівая Францыя», які ўзначальвае Жан-Люк Мэляншон, і камуністаў.

Чакаецца, што ў парлямэнт будуць выбраныя 8 дэпутатаў ад «Нацыянальнага фронту» Марын Лё Пэн. У мінулым скліканьні іх было ўсяго 2. Сама Лё Пэн таксама стала дэпутаткай, атрымаўшы перамогу ў акрузе Энэн-Бамон на поўначы краіны.

Выбары прайшлі празь месяц зь нечым пасьля таго, як Макрон выйграў прэзыдэнцкія выбары ў Лё Пэн. Сярод палітычных мэтаў Макрона — значнае зьмякчэньне строгага працоўнага заканадаўства і скарачэньне дзясяткаў тысяч працоўных месцаў у дзяржаўным сэктары.

Ваша меркаваньне

Паказаць камэнтары

XS
SM
MD
LG