Прэзыдэнт ЗША Дональд Трамп у аўторак даў зразумець, што ён выкарыстаў свой уплыў для таго, каб пераканаць арабскія краіны разарваць дыпляматычныя стасункі з Катарам (на момант публікацыі ўжо 9 краінаў зрабілі гэта).
У сэрыі паведамленьняў у Twitter прэзыдэнт ЗША заявіў, што падчас нядаўняга візыту на Блізкі Ўсход абмяркоўваў фінансавую падтрымку, якую ўлады Катару аказваюць тэрарыстычным групам. Дональд Трамп растлумачыў, што «рады бачыць», што яго перамовы з каралём Саудаўскай Арабіі Салманам і кіраўнікамі 50 мусульманскіх дзяржаў «ужо прынесьлі вынікі».
«Яны казалі, што зоймуць жорсткую пазыцыю ў дачыненьні да фінансаваньня экстрэмістаў, і ўсе доказы паказвалі на Катар, — напісаў Трамп. — Можа быць, гэта стане пачаткам канца жахаў тэрарызму!»
Паводле прэс-сакратаркі Дзярждэпартамэнту Гізэр Наўэрт, стасункі Злучаных Штатаў з Катарам «застаюцца моцнымі», і абедзьве краіны «працягваюць супрацоўнічаць... у пытаньні барацьбы з тэрарызмам».
У мінулы панядзелак арабскія краіны абвясьцілі аб разрыве дыпляматычных дачыненьняў з Катарам, абвінаваціўшы эмірат у фінансавай падтрымцы тэрарызму. Першымі былі Бахрэйн, Саудаўская Арабія, Эгіпэт і Абʼяднаныя Арабскія Эміраты, пазьней да іх далучыліся Сырыя, Емэн, прызнаны ААН часовы ўрад Лібіі, Мальдывы і Маўрыцыюс. Некаторыя краіны рэгіёну заявілі аб спыненьні марскога і авіяцыйнага спалучэньня з Катарам (паветраная прастора краіны аказалася замкнёная) і высылцы дыпляматаў гэтай краіны.
Паводле газэты Financial Times, прычынай гэтага кроку стала рашэньне ўладаў Катару заплаціць каля мільярда даляраў за вызваленьне прадстаўнікоў каралеўскай сямʼі, якія былі захопленыя ў палон баявікамі шыіцкай ваенізаванай групоўкі «Катаіб Хізбала» на поўдні Іраку падчас сакалінага паляваньня.
WikiLeaks: ЗША ведалі аб фінансавай падтрымцы «ісламскай дзяржавы» Катарам
У аўторак дзяржсакратар ЗША Рэкс Тылерсан заявіў, што ў Вашынгтоне спадзяюцца, што лідэры арабскіх краінаў змогуць абмеркаваць рознагалосьсі ў ходзе перамоваў.
«ЗША прызнаюць, што Катар прыклаў намаганьні, каб паспрабаваць спыніць фінансаваньне некаторых тэрарыстычных групаў, — сказаў ён. — Гэта ўключае, у прыватнасьці, перасьлед падазраваных у гэтым фінансаваньні, замарожваньне актываў і ўвядзеньне строгіх нормаў кантролю над банкаўскай сыстэмай. Катар дамогся прагрэсу, але неабходна працягваць працу ў гэтым кірунку».
У Катары разьмешчанае Цэнтральнае камандаваньне ўзброеных сілаў ЗША на Блізкім Усходзе і ў Паўночнай Афрыцы. На авіябазе Аль-Удэйд таксама базуюцца падразьдзяленьні амэрыканскіх ВПС.
