Лінкі ўнівэрсальнага доступу

За ролікі на YouTube будуць судзіць блогера Філіповіча, які «падмяніў» сабой дзяржаўныя СМІ


Максім Філіповіч

Гомельскага блогера Максіма Філіповіча будуць судзіць паводле артыкула Кодэксу аб адміністрацыйных правапарушэньнях за «незаконны выраб прадукцыі СМІ». Пратакол складзены 2 чэрвеня ў міліцыі Савецкага раёну Гомля.

У віну Філіповічу залічаныя 17 ролікаў, а таксама стрымы, якія ён зьмясьціў на сваім канале «Гарантий нет» на YouTube.

Падставай для складаньня пратаколу паслужыў рапарт, які паступіў у Савецкі РАУС Гомля зь міліцыі грамадзкай бясьпекі УУС Гомельскага аблвыканкаму. У рапарце гаворыцца, што кантэнт утрымлівае ролікі пра суды над актывістамі, незалежнымі журналістамі-фрылансэрамі рэгіёну, а таксама матэрыялы аб супрацьдзеяньні дэкрэту № 3.

Акрамя гэтага, Філіповіч рэгулярна праводзіць наўпроставыя відэаканферэнцыі (стрымы), падчас якіх дзеліцца сваімі думкамі пра тое, што адбываецца ў Беларусі.

Праваахоўнікі прыйшлі да высновы, што з улікам росту папулярнасьці свайго каналу «Філіповіч фактычна падмяняе сабой дзяржаўныя СМІ, у тым ліку па фармаваньні грамадзкай думкі сярод грамадзян Беларусі».

Максім Філіповіч у камэнтары для журналістаў не хавае, што ў шоку ад падобнай высновы. Цяпер, па яго словах, аўтаматычна пад перасьлед падпадае любы канал на YouTube. «Бяры любы ролік і складай пратакол. Жалезная заслона апускаецца», — кажа блогер.

Ён не выключае, што падставай да чарговага адміністрацыйнага перасьледу стала элемэнтарная помста — ня так даўно ён на сваім канале скрытыкаваў сюжэт Беларускага тэлебачаньня, у якім журналісты ганьбілі ягоную жонку Юлію.

Сёлета Максім Філіповіч за некалькі заходаў адседзеў 30 сутак у гомельскім ізалятары часовага ўтрыманьня. Яго вінавацілі ва ўдзеле ў несанкцыянаваных «Маршах недармаедаў» у Гомлі, Берасьці, Маладэчне і Пінску.

Ваша меркаваньне

Паказаць камэнтары

XS
SM
MD
LG