Лінкі ўнівэрсальнага доступу

«Дзякуй, што вы такія жывыя», — як NAVI падтрымалі герояў кнігі «Жыцьцё пасьля раку»


«Добрай раніцы! Я памятаю, як убачыў „NAVI“ на прэзэнтацыі кнігі! А зараз яны ў фінале!».

Такі допіс у фэйсбуку я атрымала сёньня раніцай ад Паўла Маісеева, загадчыка аддзелу супрацьракавай барацьбы Рэспубліканскага цэнтру анкалёгіі і мэдычнай радыялёгіі. Павал згадваў прэзэнтацыю кнігі «Жыцьцё пасьля раку» 20 кастрычніка 2014 году ў Канцэртнай залі «Менск», у якой сам браў удзел як анколяг і аўтар прадмовы да кнігі.

Кніга выйшла ў сэрыі «Бібліятэка Свабоды». «Жыцьцё пасьля раку» — гэта 22 гісторыі анкалягічных пацыентаў, якія ўсьвядомілі, што сьмерць можа быць блізка, але іх жыцьцё ў такой сытуацыі набывае іншы сэнс, якія жывуць пасьля анкалягічнага дыягназу 5, 10, 20 і болей гадоў і ведаюць, што рак — гэта не прысуд.

Я была аўтаркай ідэі "Жыцьця пасьля раку", укладальніцай кнігі і вядучай той імпрэзы. Гэта была вельмі кранальная прэзэнтацыя з удзелам герояў кнігі, якія шчыра распавядалі пра свой досьвед жыцьця пасьля анкалягічнага дыягназу. На прэзэнтацыі бясплатна на знак салідарнасьці з героямі кнігі пагадзіліся выступіць тры беларускія гурты NAVI, RECHA і RAHIS.

Калі на сцэну выйшлі NAVI, салістка Ксенія Жук не магла стрымаць сьлёзы:

«У маёй сямʼі таксама была такая сытуацыя. Вельмі складана пра гэта гаварыць. Я вельмі трымаюся, каб не заплакаць. Дзякуй вам вялікі за тое, што вы ўсе такія жывыя, вы ўсе такія сумленныя, шчырыя. Я з вамі так згодная, што трэба верыць... І каб думкі былі сьветлыя... Аплядысмэнты вам. Так хацела не расплакацца, але не атрымалася. Мы будзем для вас граць нашыя песьні, яна вельмі сонечныя, і калі камусьці дапаможа наша музыка, мы будзем вельмі ўдзячныя, таму што для такіх цудоўных людзей сёньня граць для нас вялікі гонар».

Саліст Арцём Лукʼяненка, які быў у майцы свабодаўскай кампаніі «ПеРАКможам» казаў, што гэта першы іх досьвед выступу менавіта перад такой аўдыторыяй, і самае галоўнае для яго, што людзі настроеныя на пазытыў, гэтак жа як і іх музыка.

Выступ NAVI з 49 хвіліны.

Цяпер гурт называецца NAVIBAND. Іх музыка сапраўды сонечная, сапраўды пазытыўныя. Я ня ведаю, хто меў анкалягічную хваробу ў сямʼі Ксеніі, ня ведаю, ці перамаглі яны рак. Але калі я глядзела іх выступ на Эўравізіі, то ўсьведамляла, што ў той момант NAVI ганарылася ня толькі іх сямʼя, сябры, знаёмыя, усе героі кнігі «Жыцьцё пасьля раку», але і ўся Беларусь. Бо яны — сапраўдныя і такія жывыя...

Яны ўжо перамаглі.

Меркаваньні, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

Ваша меркаваньне

Паказаць камэнтары

XS
SM
MD
LG