Лінкі ўнівэрсальнага доступу

Астаповіч пойдзе ў Міністэрства культуры з прапановамі наконт конкурсу на помнік у Курапатах


Антон Астаповіч

Старшыня Таварыства аховы помнікаў Антон Астаповіч запрошаны на сустрэчу ў Міністэрства культуры ў пытаньні конкурсу на мэмарыялізацыю Курапатаў. Як ён расказаў Свабодзе, на сустрэчы могуць прысутнічаць намесьнікі міністра, але наўрад ці сам міністар культуры.

У час сустрэчы Астаповіч хоча прыгадаць просьбы, агучаныя ў ранейшым адкрытым лісьце: таварыства падтрымлівае сам факт конкурсу, але зьвяртае ўвагу на празьмерна сьціслыя тэрміны і неагучаны склад журы, а таксама на тэхнічнае патрабаваньне выканаць плян на геападаснове маштабам 1:500, што робіць немагчымым удзел усіх ахвочых, бо такая геападаснова не даецца ўдзельнікам і адкрытая толькі для службовага выкарыстаньня.

«Мы падтрымліваем конкурс, але лічым умовы несправядлівымі ў дачыненьні шматлікіх творчых калектываў і адпаведна просім зьмяніць умовы і перанесьці тэрміны конкурсу, — кажа Астаповіч. — І я хацеў бы акцэнтаваць увагу на абяцаньні „шырокага ўдзелу грамадзкасьці“: для мяне гэтае слова „грамадзкасьць“ — бязьлікая абстракцыя, бо што гэта такое і які сэнс у гэта ўкладаецца? Калі мы гаворым пра нейкія грамадзкія інстытуцыі, давайце іх называць!

Прапаную далучыць да працы конкурснага журы менавіта Грамадзкую назіральную камісію ў ахове гісторыка-культурнай спадчыны пры Міністэрстве культуры — гэта ўпаўнаважаны орган, створаны паводле пастановы Саўміну загадам Міністэрства культуры, куды ўваходзяць досыць кваліфікаваныя людзі».

На мінулым тыдні ў Міністэрства культуры наконт курапацкага пытаньня хадзілі прадстаўнікі грамадзкай ініцыятывы «Экспэрты ў абарону Курапатаў» — зь іхнымі словамі пра занадта кароткія тэрміны і спрэчны парадак правядзеньня конкурсу міністар культуры Барыс Сьвятлоў вусна пагадзіўся, а таксама не пярэчыў заяве аб тым, што для годнай мэмарыялізацыі трэба дамагацца адкрыцьця архіваў зь імёнамі ахвяраў. Але ці зьявяцца за сустрэчай афіцыйныя рашэньні, невядома.

Тым часам у Менску судзяць шэраг удзельнікаў акцыі ў абарону Курапатаў. Аднаму з удзельнікаў, сустаршыню БХД Віталю Рымашэўскаму акцыя абышлася ў штраф 40 даляраў за хвіліну. Таксама шэраг абаронцаў Курапатаў зьяўляюцца фігурантамі «справы Белага легіёну», некаторыя зь іх застаюцца за кратамі.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG