Лінкі ўнівэрсальнага доступу

На конкурс у справе мэмарыялу ў Курапатах улады даюць тры з паловай тыдні. На падвядзеньне вынікаў — чатыры дні


У Курапатах зьбіраюцца паставіць помнік «усім бязьвінным ахвярам ХХ стагодзьдзя». Гэта вынікае з дакумэнтаў, якія датычаць стварэньня мэмарыяльнага знаку ў Курапатах і якія аказаліся ў распараджэньні Радыё Свабода.

З дакумэнтаў вынікае, што конкурс абвешчаны паводле загаду № 69 Міністэрства культуры ад 24 сакавіка 2017 году. Мэта конкурсу: «Пошук найбольш выразнага мастацкага адбітку вобразу урочышча Курапаты як агульнанацыянальнага месца памяці і прымірэньня».

Дакумэнты разасланыя ў зацікаўленыя арганізацыі 28 сакавіка 2017 году.

Праекты можна падаваць да 26 красавіка 2017 году, а вынікі будуць падведзеныя журы 1 траўня 2017 году. Актывісты ініцыятывы за «Экспэрты ў абарону Курапатаў» зьвярнулі ўвагу, што ў Палажэньні пра конкурс сьцьвярджаецца, што памятны знак павінен быць прысьвечаны «адбыўшымся ў дадзеным месцы трагічным падзеям і адлюстроўваць ідэю ўвекавечаньня памяці ўсіх бязьвінна загінуўшых ахвяр ХХ стагодзьдзя ў гісторыі Беларусі».

У інтэрвію Радыё Свабоды сябра ініцыятывы «Экспэрты ў абарону Курапатаў», адзін з арганізатараў выставы «Праўда пра Курапаты» Вінцук Вячорка пракамэнтаваў сытуацыю:

Вячорка: У першую чаргу выклікае вялікія пытаньні момант, калі абвяшчаецца гэты конкурс. Цяпер сядзіць у турме арганізатар нядаўняй абароны Курапатаў Зьміцер Дашкевіч. Адміністрацыйна арыштаваны Павал Севярынец, арганізатар колішняй абароны Курапатаў падчас будаўніцтва кальцавой дарогі. Гэта людзі, якія павінны былі б ня толькі мець голас, але і запрошаныя ў журы агульнанацыянальнага конкурсу, калі ягоная задача сапраўды пазначыць вынясеньне зь мінуўшчыны высноваў і прымірэньне, заяўленыя у варунках.

Другое. Ва ўмовах конкурсу патрабуецца, сярод іншых шматлікіх дакумэнтаў, падаць горадабудаўнічы плян вырашэньня прасторы вакол помніка. Але дагэтуль не разьвязанае пытаньне вяртаньня справядлівых ахоўных межаў, прынамсі тых зафіксаваных у праекце 2003 году.

І трэцяе. Абсалютна ненармальны, нефункцыянальны час на падачу заявак і праектаў. Гэта фактычна тры з паловай тыдні, а патрабуюцца вельмі сур’ёзныя мастацкія і тэхнічныя абгрунтаваньні. Не ўяўляю, каб людзі, якія адказна ставяцца да сваёй працы і такога выкліку, маглі б пасьпець якасна гэта зрабіць.

На падвядзеньне вынікаў журы, якое застаецца ананімным, таксама адпушчана менш за тыдзень. Гэта настолькі каньюнктурна, што можна здагадвацца: або разьлік на тое, што ніхто не падасьць, бо не пасьпее, або ў іх ужо ёсьць напагатове нейкая вэрсія дзяжурнага помніка.

Але галоўнае ўсё ж не арганізацыйныя моманты, а зьмест мэмарыялу, прапанаваны ўладамі: маўляў, усім бязьвіным ахвярам ХХ стагодзьдзя. А не ахвярам камуністычных рэпрэсіяў. Інакш кажучы, улады так і не прызналі, хто вінаваты ў масавых курапацкіх забойствах, бо пачуваюцца іхнымі пераемнікамі. Менавіта таму яны не раскрываюць імёнаў тых, хто расстраляны ў Курапатах. А як можна ўшанаваць ахвяраў без імёнаў? Думаю, прыстойныя творцы задумаюцца, ці ўдзельнічаць у такой прафанацыі.

Інфармацыя МІністэрства культуры аб правядзеньні конкурсу для зацікаўленых арганізацый

Інфармацыя МІністэрства культуры аб правядзеньні конкурсу для зацікаўленых арганізацый

Першая старонка Палажэньня аб правядзеньні конкурсу

Першая старонка Палажэньня аб правядзеньні конкурсу

Другая старонка Палажэньня аб правядзеньні конкурсу

Другая старонка Палажэньня аб правядзеньні конкурсу

  • 16x9 Image

    Сяргей Абламейка

    Сяргей Абламейка нарадзіўся ў Менску. Скончыў гістарычны факультэт БДУ. Працаваў сьлесарам на МАЗе, выкладаў гісторыю ў школе, быў навуковым супрацоўнікам Музэю народнай архітэктуры і побыту, пасьля Скарынаўскага цэнтру. На «Свабодзе» – зь верасьня 1990 году, з траўня 1995 году – у Празе. Пісьменьнік, гісторык, журналіст.

Ваша меркаваньне

Паказаць камэнтары

XS
SM
MD
LG