Лінкі ўнівэрсальнага доступу

«Дэкрэт ні пры чым, Лукашэнка павінен сысьці ў адстаўку», — агляд пратэстаў 12 сакавіка ў Бабруйску, Берасьці, Воршы і Рагачове ФОТА, ВІДЭА


Акцыя пратэсту супраць дэкрэту №3 у Бабруйску, 12 сакавіка 2017 году

Чатыры вулічныя акцыі супраць дэкрэту № 3 адбыліся 12 сакавіка ў Беларусі. Усюды людзі патрабавалі адстаўкі прэзыдэнта і ўраду і абураліся эканамінчым станам краіны.

Бабруйску, Воршы і Рагачове, дзе мерапрыемствы былі абвешчаныя загадзя, у цэнтр гораду выйшлі ад 500 да 1000 чалавек. У Берасьці акцыя не анансавалася, у ёй паўдзельнічалі каля 60 чалавек.

Большасьць удзельнікаў акцыяў ува ўсіх гарадах — пэнсіянеры, якія не трапляюць пад дзеяньне дэкрэту № 3, але абураюцца, што іхныя дзеці і ўнукі ня могуць працаўладкавацца. Шмат людзей абураліся тым, што дзяржаўнае тэлебачаньне не асьвятляе пратэсты супраць дэкрэту № 3, якія ахапілі ўсю Беларусь.

Ва ўсіх гарадах вулічныя акцыі адбыліся практычна без арганізатараў і палітычных лідэраў, ахвочыя выказацца проста падыходзілі да гукаўзмацняльнай апаратуры, мікрафонаў журналістаў і расказвалі, чаму яны выйшлі пратэставаць. Толькі ў Воршы на мітынгу прамаўляў сустаршыня БХД Павал Севярынец, пасьля акцыі яго затрымалі.

Бабруйск — «Бабры не рабы!»

Акцыя супраць дэкрэту №3 у Бабруйску 12 сакавіка 2017
Акцыя супраць дэкрэту №3 у Бабруйску 12 сакавіка 2017

Акцыя прайшла зь вялікай колькасьцю плякатаў са слёганамі: «Бабры не рабы», «Праз дэкрэты і налогі хутка ўсе працягнем ногі», «Нет декрету № 3! Лукашенко, уходи!», «Заплаці падаткі і сьпі галодным», «Дэкрэту — не, працы — так», «Разам — мы сіла».

Людзі наракалі на немагчымасьць уладкавацца на працу, на маленькія пэнсіі, платныя мэдычныя паслугі, высокія цэны на прадукты, высокую сьмяротнасьць ад анкалёгіі, а таксама хлусьню ў СМІ. Усе, хто гаварыў, згодныя, што «ўладу трэбя мяняць».

Падчас акцыі гучалі споклічы: «Нет декрету № 3! Лукашенко, уходи!», «Баста!», «Жыве Беларусь!».

На мітынгу выступіў былы палітвязень Яўген Глаголеў-Васьковіч. Ён заклікаў не палітызаваць акцыю, выкарыстоўваць спокліч «Баста!» у знак пратэсту супраць усё новых і новых падаткаў. «Неўзабаве з нас будуць браць за тое, што мы проста ходзім па зямлі Беларусі», — сказаў ён.

Жанчына плача на акцыі ў Бабруйску 12 сакавіка 2017 году
Жанчына плача на акцыі ў Бабруйску 12 сакавіка 2017 году

Адна з удзельніц, жанчына сярэдняга веку, пачала плакаць проста перад камэрамі журналістаў, скардзячыся, што «так жыць далей немагчыма»: «У мяне гістэрыка! Лукашэнка павінен сесьці й падумаць, як нам жыць. У 90-я гады было нашмат лепш. Я столькі год жыву ў гэтым горадзе, але так кепска ніколі не было. Я ня ведаю, як жыць далей».

Берасьце — шэсьце па цэнтры гораду

Каля 60 чалавек сабраліся на цэнтральнай плошчы ў Берасьці. Пасьля абмеркаваньня далейшых дзеяньняў яны прайшлі шэсьцем па вуліцы Савецкай і разышліся. Арганізатары шэсьця мелі гукаўзмацняльную апаратуру, празь якую абвесьцілі пра чарговыя акцыі «недармаедаў» — 25 сакавіка ў Менску і 26 сакавіка — ва ўсіх гарадах Беларусі.

Ворша — больш за 20 затрыманых, у тым ліку незалежныя журналісты

Інфармацыя пра затрыманьні ў Воршы стала зьяўляцца ад самай раніцы. Ператрусы адбыліся ў кватэрах актывіста Канстанціна Анташкевіча і журналіста «Радыё Рацыя» Арцёма Сізінцава. Таксама прэвэнтыўна быў затрыманы рэгіянальны кіраўнік кампаніі «Гавары праўду!» Ігар Грышанаў. Незадоўга да акцыі затрымалі журналіста «Нашай Нівы» Сяргея Гудзіліна і журналістку БелаПАН Адар’ю Гуштын, якіх выпусьцілі пасьля завяршэньня акцыі.

Людзі, якія спачатку прыйшлі на цэнтральную плошчу, вырашылі рушыць да будынку гарадзкой адміністрацыі. Там да іх выйшлі прадстаўнікі гарадзкіх уладаў і нават запрасілі ў залю. На што быў адказ: «Пайшлі прэч!».

Мітынг на прыступках гарадзкой адміністрацыі ў Воршы, 12 сакавіка 2017 году
Мітынг на прыступках гарадзкой адміністрацыі ў Воршы, 12 сакавіка 2017 году

Мітынг каля гарадзкой адміністрацыі ў Воршы ўзначаліў Павал Севярынец: «Людзі ня могуць пракарміць свае сем’і. Дэкрэт № 3 — гэта была апошняя кропля. Але цяпер мы патрабуем ня толькі яго скасаваньня, мы патрабуем, каб гэты рэжым-банкрут сышоў. Нам не патрэбныя Лукашэнка, Качанава, Кабякоў, Лісоўскі».

Удзельнікі падтрымалі Севярынца, скандуючы: «Далоў халуёў», «Жыве Беларусь!», «Баста», «Нет декрету № 3! Лукашенко, уходи!». Севярынец заклікаў аршанцаў далучацца да акцыяў 15 і 25 сакавіка ў Менску: «Вырашацца ўсё будзе ў сталіцы. 15 і 25 сакавіка мы павінны праявіць салідарнасьць». Пасьля акцыі Севярынец быў затрыманы.

Таксама ў РУУС даставілі цэлы шэраг незалежных журналістаў: Галіна Абакунчык з «Радыё Свабода», Андрэй Шаўлюга зь БелаПАН, Кацярына Бахвалава і Аляксандар Баразенка зь «Белсату». Усіх, апроч Кацярыны Андрэевай і Галіны Абакунчык, празь некаторы час выпусьцілі. Магчыма, затрыманым журналісткам пагражае адміністрацыйны арышт.

Рагачоў — «Мы Лукашэнку выбралі, а ён нам здрадзіў»

На акцыі ў Рагачове сярод удзельнікаў акцыі адбылося некалькі гарачых спрэчак. Некаторыя людзі спрабавалі даказаць, што «пытаньне з дэкрэтам № 3 вырашана», і «няма ніякага сэнсу тут пратэставаць».

У адказ на такія словы чулася, што «гэта людзі, чые дзеці працуюць чыноўнікамі і міліцыянтамі». Праблемы ў Рагачове такія ж, як і ў іншых гарадах Беларусі, — беспрацоўе, нізкія заробкі і пэнсіі. Людзі ня вераць, што Лукашэнка адмяніў дэкрэт № 3, і просяць даць працу іхным дзецям і ўнукам.

Шэсьце ў Рагачове падчас акцыі супраць дэкрэту №3, 12 сакавіка 2017 году
Шэсьце ў Рагачове падчас акцыі супраць дэкрэту №3, 12 сакавіка 2017 году

Людзі прызнаваліся, што на выбарах прэзыдэнта галасавалі за Лукашэнку, але ён іх расчараваў, ня выканаў ніякіх сваіх абяцаньняў: «Калі прэзыдэнт ня можа выканаць тое, што ён павінен, ён мусіць сысьці. Мой муж і сын езьдзяць у Расею. Мы выбіралі прэзыдэнта, каб ён нас адстойваў. А тут такое адчуваньне, што ўлада і народ жывуць у розных дзяржавах. Але наўрад ці ўлады паслухаюцца. Будуць пагражаць людзям, каб не хадзілі на акцыі».

Ад некаторых удзельнікаў гучала інфармацыя, што ім пагражалі звальненьнем, калі будуць заўважаныя на акцыі.

Напярэдадні маршаў «Мы не дармаеды» затрымалі больш за 20 чалавек, у тым ліку старшыню АГП Анатоля Лябедзьку, старшыню Руху «За Свабоду» Юрася Губарэвіча, сустаршыню БХД Віталя Рымашэўскага (ім прысудзілі па 15 сутак) і лідэрку Хрысьціянска-дэмакратычнага руху Вольгу Кавалькову (7 сутак).

Ваша меркаваньне

Паказаць камэнтары

XS
SM
MD
LG