Усе звароты разглядаюцца ў індывідуальным парадку, запэўніў Свабоду начальнік дэпартамэнту грамадзянства і міграцыі МУС Беларусі Аляксей Бягун. У расейскім сьпісе непажаданых асобаў на ўезд у краіну шмат вышэйшых службовых асобаў Украіны: міністры ўнутраных спраў і абароны, кіраўніцтва СБУ, Вярхоўнай Рады, Кабінэту Міністраў, шэраг кіроўных асобаў адміністрацыі прэзыдэнта. Ці азначае гэта, што ўсяму кіраўніцтву Ўкраіны аўтаматычна забаронены ўезд на тэрыторыю Беларусі, бо ў Беларусі і Расеі агульная база неўязных?
Начальнік Дэпартамэнту грамадзянства і міграцыі МУС Беларусі Аляксей Бягун на гэтае пытаньне адказаў так:
— Ёсьць пагадненьне аб узаемным прызнаньні рашэньняў пра адмову іншаземцам на ўезд у краіну, якое дзейнічае зь мінулага году. Але калі вы ўважліва прачытаеце пагадненьне, то там напісана: «Кампэтэнтныя органы ў межах унутраных працэдур могуць дазваляць уезд і знаходжаньне грамадзянам, якім накладзена адпаведнае абмежаваньне». То бок ня толькі МУС, але і іншыя кампэтэнтныя органы дазваляюць наведваньне Беларусі на падставе адпаведнага звароту альбо пад нейкае палітычнае мерапрыемства, на якім плянуецца ўдзел той ці іншай службовай асобы. Мэханізм такі ёсьць, і ён працуе. Рашэньне прымаецца на мэтавы зварот канкрэтнай асобы«, — запэўніў палкоўнік міліцыі Аляксей Бягун.
— А чаму так адбылося зь вядомым украінскім літаратарам Сяргеем Жаданом, якога спачатку ўпусьцілі ў краіну, а потым сярод ночы паднялі, завезьлі ў пастарунак, паставілі штамп у пашпарце і загадалі пакінуць Беларусь?
— Як чаму? Таму што ягоныя пэрсанальныя зьвесткі ўключаныя ў сьпіс.
— Як яго тады прапусьцілі ў краіну, і раней ён прыяжджаў неаднаразова?
— Таму што ў яго транскрыпцыя ў пашпарце і сьпісе розная, напісаньне прозьвішча адрозьніваецца на дзьве літары. А ў сыстэмах унутраных органаў больш пашыраныя зьвесткі, крыху іншыя ўлікі, якія прадугледжваюць больш пашыраны пошук, і органы МУС вызначылі, што пэрсанальныя зьвесткі ўнесеныя ў сьпіс. Таму яго і затрымалі.
— А чаму так жорстка зь ім абышліся?
—Таму што ў яго «афарбоўка» адпаведная.
— Хто потым прыняў рашэньне аб ануляваньні забароны? На якім узроўні?
— На самым высокім узроўні.
— А можна ўдакладніць: на ўзроўні міністра ці прэзыдэнта?
— На самым высокім узроўні.
Раней начальнік дэпартамэнту грамадзянства і міграцыі Аляксей Бягун тлумачыў, што кожны грамадзянін Украіны ці любой іншай дзяржавы можа зьвярнуцца на сайт МУС Беларусі з мэтавым запытам: напісаць электронны зварот, прыкласьці копіі дакумэнтаў, і цягам трох працоўных дзён ён атрымае адказ, ці ёсьць перашкоды для ягонага ўезду ў Беларусь.
