Лінкі ўнівэрсальнага доступу

«Усё добра, робім новых севастопальцаў»: як Крым жыве безь сьвятла


Фота з інстаграму @vikabalkina

Ужо чацьвёрты дзень у большай частцы Крыму няма электрычнасьці. Свабода распытала крымчанаў пра жыцьцё безь сьвятла і зазірнула ў іхнія інстаграмы.

Пасьля «блэкаўту», зладжанага ўкраінскімі актывістамі, якія выступаюць за эканамічную блякаду Крыму, паўвостраў застаўся бяз прыкладна 70% энэргазабесьпячэньня. Па большай частцы Крыму няма сьвятла, на крытычна важныя аб’екты электрыка падаецца з рэзэрвовых крыніцаў. Лідэр крымскіх татараў кажа, што энэргазабесьпячэньне можа быць адноўленае празь некалькі дзён.

Многія ўкраінцы кпяць з крымчанаў: маўляў, Украіна і ня мусіць забясьпечваць тэрыторыі, анэксаваныя краінай, якая вядзе супраць іх вайну. Іншыя згадваюць, што ў Расеі ня раз гучалі прапановы спыніць пастаўкі энэргарэсурсаў ва Ўкраіну ці Грузію, вёўся «газавы шантаж». Ёсьць і тыя, хто спачувае крымчанам як ахвярам палітычнага канфлікту.

Крымчане тым часам выжываюць. Зрэдку выходзяць ва «ЎКантакце» ды посьцяць фоты ў Instagram. І падобна, што ня трацяць аптымізму.

«Жывуць са сьвечкамі ў поўнай рамантыцы. Сьвечкі сканчаюцца»

Кацярына з Керчы распавядае Свабодзе, што цяпер яна ня ў Крыме, але там засталіся ейныя родныя:

«Мае родзічы безь сьвятла і бяз сувязі ў Керчы. Генэратараў няма. Дзякуй, што ваду далі. Жывуць са сьвечкамі ў поўнай рамантыцы. Дарэчы, сьвечкі сканчаюцца. Лякарні працуюць, крамы — ня ўсе.

Вінаватыя гады, што падарвалі (апоры ЛЭП на тэрыторыі Ўкраіны. — РС). Расея дзейнічае і прымае меры, каб забясьпечыць Крым сьвятлом. Сёньня генэратары меліся завезьці ў кожны горад. У вялікіх гарадах па гадзінах давалі сьвятло, у Керчы — не. Абяцаюць 22 сьнежня запусьціць сьвятло ўжо з Расеі. Паглядзім, як будзе. Дзякуй прыродзе і надвор’ю за +20 на вуліцы».

«Я б хацеў, каб гэта працягвалася як мага даўжэй»

«Людзі добра перажываюць, — распавядае Леанід зь Ялты. — У гэтым ёсьць шмат плюсаў, якіх літаральна пазбаўлены сучасны сьвет. Усё, што трэба, у горадзе можна знайсьці. Асабіста ў мяне сьвятло адключаецца вельмі рэдка, бо жыву на лініі радзільні, праблемаў ні з чым не адчуваю. Прычынам, якія гэта выклікалі, не даю ніякіх ацэнак.

Адзінае, што продажы (у бізнэсе Леаніда. — РС) з-за гэтага падаюць адсоткаў на 20. Некаторыя прадпрыемствы нясуць страты, асабліва тыя, што гандлююць прадуктамі. А тыя, хто працягвае працаваць нягледзячы на праблемы з электрычнасьцю, падвышаюць свае продажы на 50–60 адсоткаў, таму што пазбаўленыя канкурэнцыі.

Так жыць цікавей. Няхай, можа, у мяне і „злое“ жаданьне, але я б хацеў, каб гэта працягвалася як мага даўжэй. Але не даўжэй за 20 дзён».

«Робім новых севастопальцаў, кантактуем з родзічамі»

«Усё добра, робім новых севастопальцаў, стасуемся з родзічамі, — аптымістычна распавядае Юлія зь Севастопаля. — Ходзім працуем, па вечарох усе шпацыруюць у цэнтры. Нагадвае той час, калі нас да Расеі далучылі, усе хадзілі і радаваліся. Вельмі многа людзей, каб дома не сядзець, шпацыруюць вечарамі».

На пытаньне пра тое, хто вінаваты ў такой сытуацыі, яна з усьмешкай адказвае ў адно слова: татары. Але сама дзяўчына на сабе ня моцна адчула наступствы «блэкаўту».

«У нас дома сьвятло тры гадзіны праз шэсьць, ну і падзараджаем тэлефоны ў машыне, пакуль езьдзім па справах. Хто кажа, сьвятло будзе да Новага году, хто — да 15 сьнежня. Людзі да ўсяго звыкаюць, і з гэтага можна атрымаць плюсы. Зь мінусаў пакуль толькі тое, што мабільная сувязь барахліць».

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG