Плошча лясных пажараў на тэрыторыі Забайкальля працягвае расьці і дасягнула 118 тысяч гектараў.
Паводле дзяржаўнай лясной службы краю, у Забайкальлі дзейнічаюць 44 лясныя пажары ў 12 раёнах, палова зь якіх — у Чыцінскім раёне. Для ліквідацыі пажараў прыцягнутыя больш за 1200 чалавек, у тым ліку парашутысты-дэсантнікі, задзейнічана 219 адзінак тэхнікі.
Ахвярамі маштабных прыродных пажараў, якія ахапілі Хакасію, Туву, Забайкальле і Краснаярскі край, сталі 34 чалавекі, тысячы чалавек пацярпелі і засталіся бяз даху над галавой. У аўторак Хакасію наведаў прэзыдэнт Расеі Ўладзімер Пуцін. Ён запатрабаваў прыцягнуць да адказнасьці службовых асобаў, вінаватых у распаўсюдзе пажараў у рэгіёне, а таксама пачаць выплаты кампэнсацыяў пацярпелым.
Аднак, як распавёў Радыё Свабода жыхар вёскі Чапаева, разьмешчанай у 13-ці кілямэтрах ад Абакана, чыноўнікі адмаўляюцца разглядаць заявы людзей, якія не былі зарэгістраваныя ў згарэлых дамах, а таксама тых, у каго згарэлае жыльлё не было адзіным. Ён ня выключыў, што ўлады рэгіёну такім чынам папросту крадуць грошы, якія выдзяляюцца з фэдэральнага цэнтру на ліквідацыю наступстваў трагедыі.