Актыўная фаза антытэрарыстычнай апэрацыі ў Славянску

Як паведамляе Еспресо.TV са спасылкай на журналіста Рамана Бурко, сярод баевікоў у горадзе пачалася паніка:

«Украінскія вайскоўцы вызвалілі Хрэсьцішча, за 5 км ад Славянску. Танкі ўжо прайшлі Сідарава. Гэта таксама дзесьці 5–6 км ад Славянску. Гараць шыны на блёк-пасьце з боку Хрэсьцішча. Мабільнай сувязі апэратара МТС наагул няма. Усіх мірных жыхароў Славянску просяць схавацца ў сваіх дамах. Усе баевікі, якія не здалі зброю, будуць зьнішчаныя».

Сёньня раніцай паміж Славянскім і Сьвятагорскам група ўзброеных людзей атакавала сэпаратыстаў на блёк-пасьце, двое мужчын загінулі, ёсьць параненыя, паведаміў мясцовы сайт.

Фатограф AFP бачыў 5 ўкраінскіх бронетранспарцёраў.


Прэсавы сакратар сэпаратыстаў паведаміла AFP, што людзі, якія ўтрымліваюць кантроль над гарадзкім саветам ў Славянску, рыхтуюцца да штурму:

«Узброеныя мужчыны, якія ахоўваюць гарсавет, застаюцца на месцы», — сказала яна, адзначыўшы, што іншым грамадзянскім асобам загадана пакінуць гэтае месца.
Reuters паведамляе, што ўкраінскія салдаты атрымалі кантроль над блокпастом сэпаратыстаў на поўначы Славянска.

Барыкада, якую падпалілі сэпаратысты, яшчэ працягвае гарэць.

Забіта 5 сэпаратыстаў

МУС Украіны пацьвярджае зьнішчэньне 5 тэрарыстаў, аднаго байца ўкраінскага войска паранілі:

«У ходзе антытэрарыстычнай апэрацыі, падразьдзяленьнямі МУС і МА разблякаваныя і зьнішчаныя 3 блокпаста незаконных узброеных фарміраваньняў у паўночна-ўсходняй частцы горада Славянска Данецкай вобласьці».


Пра гэта паведамляе прэс-служба МУС Украіны перадае Еспресо.TV.

Лідэр сэпаратыстаў пагражае расстрэламі

Падчас антытэрарыстычнай апэрацыі ў Славянску былі распаўсюджаныя ўлёткі з заклікамі да насельніцтва. Яны выклікалі выбух абурэньня ў сэпаратыстаў.

Пра гэта паведамляе МУС Украіны.

Ва ўлётках насельніцтва заклікаюць зьберагаць спакой, па магчымасьці не пакідаць свае дамы, не адпускаць дзяцей без нагляду бацькоў на вуліцы горада, не паддавацца на правакацыі і не выконваць злачынныя загады прадстаўнікоў самаабвешчанай незаконнай улады.

Самазваны народны мэр Славянска Панамароў абвясьціў аб «расстрэле на месцы кожнага, у каго будзе выяўленая гэтая ўлётка».

СБУ мае доказы датычнасьці «народнага мэра» Славянска да забойства дэпутата Рыбака

СБУ апублікуе аўдыёзапіс тэлефонных перамоваў Ігара Стралкова, Ігара Безьлера і Вячаслава Панамарова, якія пацьвярджаюць іх датычнасьць да забойства дэпутата гарсавета Славянска Ўладзімра Рыбака

Пра гэта паведаміла начальнік прэс-службы СБУ Марына Астапенка.

Па яе словах, аўдыёзапіс ў бліжэйшы час будзе разьмешчаны на афіцыйным сайце СБУ і распаўсюджаны ў інтэрнэце.

Пуцін: Выкарыстаньне арміі ў Славянску — злачынства супраць народу

Жыхары Славянску, Горлаўкі і Марыюпаля ў трывозе

СБУ апублікавала аўдыёдоказы датычнасьці «народнага мэра» Славянска Панамарова да забойства дэпутата Рыбака

Пуцін паўтарыў, што выканаўчыя ўлады ў Кіеве — нелегітымныя:

«Калі сёньняшнія ўлады ў Кіеве гэта зрабілі, то гэта, безумоўна, ужо хунта, нейкая кліка проста. Па-першае, у іх няма агульнанацыянальнага мандату, яны, у найлепшым выпадку, маюць толькі некаторыя элемэнты легітымнасьці, толькі ў рамках парлямэнту».

Прэзыдэнт Расеі назваў меркаваную вайсковую апэрацыю ў Славянску «карнай» і прыгразіў бліжэй неакрэсьленымі наступствамі міждзяржаўнага характару:

«І калі вось гэтыя людзі перайшлі да так званай вострай фазы, то гэта ня нейкая вострая фаза, гэта проста карная апэрацыя, і яна безумоўна будзе мець наступствы для тых людзей, якія прымаюць рашэньні падобнага роду, у тым ліку гэта адносіцца і да нашых міждзяржаўных адносін» — сказаў Пуцін на сустрэчы з прадстаўнікамі рэгіянальных СМІ ў Санкт-Пецярбургу.

Кіраўніцтва так званай «Данецкай народнай рэспублікі» абвясьціла ўсеагульную мабілізацыю ў рэгіёне ў сувязі з апэрацыяй ўкраінскіх сілавых структур у Славянску.

«У Славянску пачалася агульнавайсковая апэрацыя. Гэта азначае толькі адно — грамадзянскую вайну», — заявілі агенцтву «Інтэрфакс» ў кіраўніцтве так званай рэспублікі.

Раней у чацьвер МУС Украіны распаўсюдзіла паведамленьне, згодна з якім у ходзе сілавой апэрацыі пад Славянскім былі забітыя пяць байцоў сіл узброеных сэпаратыстаў.

Наступ ўкраінскага спэцназу ў Славянску прыпынены, паведамляе ІТАР-ТАСС са спасылкай на мясцовыя СМІ, якія, у сваю чаргу, спасылаюцца на «сілы самаабароны»:

«Спэцапэрацыя вайскоўцаў прыпыненая. Адначасова паступаюць паведамленьні, што сапёры правяраюць маршрут далейшага праходжаньня бронетэхнікі. Раней байцы народнай самаабароны ў Славянску разам з падмацаваньнем з Чырвонага лімана адбілі наступ украінскіх вайскоўцаў, якія ўдзельнічаюць у сілавой спэцапэрацыі на ўезьдзе ў Славянск. Апалчэнцы прачэсваюць вакольную лесапаласу. Паводле некаторых зьвестак, бронетэхніка сілавікоў адведзеная, але самі вайскоўцы маглі разгрупавацца паблізу ад блёкпастоў».

Войскі Расейскай Фэдэрацыі пачалі вучэньні на мяжы з Украінай