Сёньня апоўдні Сяргей Вакуленка распачаў сухую галадоўку. Галоўнай прычынай гэтага рашэньня ён называе грубае парушэньне заканадаўства берасьцейскімі ўладамі ды асобнымі кіраўнікамі мясцовай вэртыкалі.
Выканкамаўскія чыноўнікі ўмяшаліся ў агітацыйную кампанію па давыбарах у так званую палату прадстаўнікоў. Спадар Вакуленка, які праз збор подпісаў выбаршчыкаў таксама вылучыў сваю кандыдатуру, ня можа сустракацца зь людзьмі. Сяргею Вакуленку давялося пайсьці ў вымушаны адпачынак, бо яму не даюць трапіць нават на завод "Цьветатрон", дзе ён стала працуе.
Спадар Вакуленка напісаў з гэтай нагоды заяву, якую накіраваў таксама й пракурору Маскоўскага раёну Берасьця. Ён прапануе прыцягнуць да адказнасьці мясцовых кіраўнікоў, якія сьвядома парушаюць выбарчае заканадаўства.
Варта адзначыць, што спадар Вакуленка ўжо мае досьвед правядзеньня падобных акцыяў пратэсту. У красавіку 1999 году ён 7 дзён трымаў галадоўку, каб прыцягнуць увагу грамадзкасьці да перасьледу сяброў Свабоднага прафсаюзу мэталістаў на заводзе "Цьветатрон".
Спадар Вакуленка лічыць, што тая акцыя была плённая, бо прымусіла адміністрацыю заводу пагадзіцца з заснаваньнем незалежнай прафсаюзнай суполкі на прадпрыемстве. Ейны лідэр лічыць, што й зараз ёсьць магчымасьць патрабаваць выкананьня заканадаўства праз падобныя формы пратэсту.
