Лінкі ўнівэрсальнага доступу

Дзьмітры Няфёдаў: «У суполцы — 220 тысяч чалавек. Усіх дакладна не арыштуюць»


На «Рэвалюцыю праз сацыяльную сетку» прыйшлі больш за 200 чалавек.
На «Рэвалюцыю праз сацыяльную сетку» прыйшлі больш за 200 чалавек.
Суполка “Рэвалюцыя праз сацыяльную сетку”, зарэгістраваная на сайце “Вконтакте”, прапануе кожную сераду а 19-й гадзіне праводзіць акцыі салідарнасьці на галоўных плошчах беларускіх гарадоў.

Увечары 8 чэрвеня актывісты суполкі і тыя, хто адгукнуўся на іх ініцыятыву, сабраліся на такую акцыю на Кастрычніцкім пляцы ў Менску. Паводле розных ацэнак, на плошчу прыйшло ад двухсот да чатырохсот маладых людзей.

Людзі зьбіраліся невялікімі купкамі, размаўлялі, нехта сьпяваў. Не было ні сьцягоў, ні транспарантаў, ні лёзунгаў. Адзін з адміністратараў суполкі «Рэвалюцыя праз сацыяльную сетку» «Вконтакте» Дзьмітры Няфёдаў наконт учорашняй акцыі выказаўся так:

«Так, я лічу, што яна была ўдалая. І лічу, што яна ня выйшла б настолькі ўдалай, каб мяне не затрымалі супрацоўнікі Камітэту дзяржаўнай бясьпекі. Яны зрабілі, груба кажучы, «піяр».

3 чэрвеня на кватэры Дзьмітрыя Няфёдава супрацоўнікі КДБ правялі ператрус, забралі кампутар і склалі пратакол нібыта за лаянку. Выходныя Дзьмітрый правёў у ізалятары на Акрэсьціна. 6 чэрвеня яго прывезьлі ў Заводзкі суд, але судзьдзя Мікалай Балаўнёў зьвярнуў увагу на тое, што пазначаны ў пратаколе час, калі Няфёдаў быццам бы лаяўся, не супадае з часам правядзеньня ператрусу. Яго вымушаны былі адпусьціць. Быў ціск у выходныя і на Сяргея Паўлюкевіча, адміністратара суполкі «За вялікую Беларусь». Сяргей кажа, што акцыі, падобныя да ўчорашняй, стануць рэгулярнымі:

«Плянуецца кожную сераду ў 19:00 праводзіць падобныя акцыі ва ўсіх гарадах Беларусі на галоўнай плошчы. Ніякіх сьцягоў, лёзунгаў, людзі зьбіраюцца на плошчы, гуляюць, размаўляюць, песьні сьпяваюць. Гэта робіцца з той мэтай, каб зьняць псыхалягічныя бар’еры, каб людзі перасталі баяцца выходзіць і абараняць свае правы».

Наконт мэтаў і задач, якія ставяць арганізатары падобных акцый, Дзьмітры Няфёдаў выказаўся так:
Чым больш людзей будзе прыходзіць кожны раз, тым больш людзей прыйдзе наступным разам. Галоўнае — пераадолець страх унутры сябе.

«Чым больш людзей будзе прыходзіць кожны раз, тым больш людзей прыйдзе наступным разам. Галоўнае — пераадолець страх унутры сябе. У агульным ставіць нейкія мэты… Вы ж разумееце, што ўсё тое, што я вам зараз скажу, хутчэй за ўсё, стане вядомае тым людзям, якія будуць процістаяць тым мэтам. Таму пакуль, напэўна, ранавата казаць пра нейкія мэты — мы ўсе ходзім „пад каўпаком“. Пэўна, нічога дрэннага мы не плянуем».

Сацыяльныя сеткі, у адрозьненьне ад такіх плятформаў, як, да прыкладу, Livejournal ці Twitter, больш небясьпечныя — там, так бы мовіць, меншая ананімнасьць, бо кожны рэгіструецца пад уласным імем і адміністрацыя пільна сочыць, каб людзі не карысталіся нікнэймамі. Таму спэцслужбам прасьцей вылічыць актывістаў. Ці не баяцца адміністратары суполак за сваю бясьпеку?

Сяргей Паўлюкевіч: «Улічваючы, што я свой „Марш мільёнаў“ здолеў раскруціць літаральна за 20 сутак да больш як 30 тысяч чалавек, то ў гэтым праблем няма. Тут баяцца трэба толькі тым, хто пачынае, то бок мне — бо я знаходжуся ў Беларусі, у зоне дасягальнасьці КДБ. Да прыкладу, „Рух будучыні“ — яны амаль усе цяпер за мяжой. А што да звычайных удзельнікаў, я думаю, нічога страшнага ня будзе. А вось на арганізатараў зараз будзе паляваньне».

Дзьмітры Няфёдаў наконт бясьпекі і боязі выказаў такое меркаваньне:

«Многія людзі, якія прыходзяць на акцыю, не зьяўляюцца сябрамі суполкі. То бок тыя, якія зьяўляюцца сябрамі суполкі, не прыходзяць. А тыя, хто не зьяўляецца — прыходзяць. Па вялікім рахунку, у групе — 220 тысяч чалавек. Усіх дакладна не арыштуюць. 220 тысяч проста немагчыма арыштаваць. Дый, у прынцыпе, няма за што. Хаця ў нас магчыма ўсё. Быў бы чалавек, а артыкул знойдзецца».

Роля сацыяльных сетак ва ўсім сьвеце зараз даволі значная, кажа Сяргей Паўлюкевіч:

«Эгіпет, Туніс, астатнія краіны арабскага сьвету, нават Гішпанія зараз страйкуе — моладзь таксама арганізуецца праз сацыяльныя сеткі. То бок сацыяльныя сеткі цяпер маюць вялікі ўплыў, асабліва на моладзь».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG