Былі скасаваныя амаль 10 тысяч рэйсаў. Некаторыя самалёты чакалі вызваленьня месца каля тэрміналу больш як пяць гадзін. Адхіленьні ад раскладу могуць расьцягнуцца яшчэ на некалькі дзён, перадае Reuters.
«Нашыя камутатары і маршрутызатары былі перагружаныя аб’ёмам зьвестак. Праз гэта пачалі ўзьнікаць несупадзеньні ў інфармацыі з гэтых маршрутызатараў, і таму мы спынілі працу сыстэмы», — патлумачыў прычыны збою міністар транспарту ЗША Шон Дафі, дадаўшы, што радарная сувязь ніколі цалкам не зьнікала, а тысячы самалётаў удалося бясьпечна пасадзіць.
Ён адзначыў, што непасрэдную праблему ўжо вырашылі і палёты застаюцца бясьпечнымі, але для прадухіленьня падобных збояў неабходная маштабная мадэрнізацыя ўсёй сыстэмы.
Дафі заклікаў Кангрэс вылучыць 50 мільярдаў даляраў на абнаўленьне сыстэмы, каб падобныя інцыдэнты не паўтараліся.
«У нас надзвычай старая сыстэма кіраваньня паветраным рухам, — сказаў Дафі. — Дайце нам грошы, каб гэта выправіць».
Робэрт Істан, чый рэйс у Бостан быў скасаваны, сядзіць на стужцы выдачы багажу і грае на сваёй арфе для пасажыраў. Нацыянальны аэрапорт імя Роналда Рэйгана ў Вашынгтоне, 13 лістапада 2026 году
Міністар унутранай бясьпекі Марквэйн Малін заявіў, што пакуль няма «ніводнага доказу» таго, што збой стаў вынікам кібэратакі або дзейнасьці некантраляванай сыстэмы штучнага інтэлекту, хоць сьледчыя пакуль ня выключылі ніводнага з гэтых варыянтаў.
«Падобна, што гэта была тэхнічная няспраўнасьць. Аднак мы ўсё яшчэ працягваем расьсьледаваньне», — сказаў ён.
Нягледзячы на зьняцьце забароны на палёты, праблемы для пасажыраў працягваюцца. Людзі гадзінамі чакаюць сваіх рэйсаў у перапоўненых аэрапортах. Авіякампаніі не абавязаныя плаціць кампэнсацыі пасажырам, бо яны не нясуць адказнасьці за збоі ў сыстэме Фэдэральнай управы грамадзянскай авіяцыі.
Пасажыры чакаюць аднаўленьня рэйсаў у аэрапорце мэксыканскага курортнага гораду Канкун, 13 лістапада 2026 году
Папярэдні раз пасьля тэрактаў 11 верасьня 2001 году вылеты па ўсёй краіне прыпынялі ў студзені 2023 году. Тады забарона дзейнічала каля паўтары гадзіны.