Як паведаміла выданьне «Позірк», гэтая ўзнагарода прысуджаецца ў межах «Гісторый свабоды» — спэцыяльнага кінэматаграфічнага захаду, які праходзіць падчас Бэрлінскага тыдня свабоды ў супрацы з Бэрлінскім міжнародным фэстам дакумэнтальнага кіно «Доксмэнталэ».
Цырымонія ўзнагароджаньня адбылася 11 лістапада пасьля бэрлінская прэм’еры ў кінатэатры «Калізей».
«Для фільму, які ўзмацняе галасы тых, каго прымушае замаўчаць беларускі рэжым, гэтае прызнаньне мае асабліва магутны сыгнал. Гэта нагадае нам, чаму гэтыя гісторыі маюць значэньне і чаму іх варта працягваць расказваць», — адзначылі аўтары фільму.
У інтэрвію Свабодзе Андрэй Куціла адказаў, ці дапамагаюць узнагароды знайсьці новых гледачоў і прыцягнуць увагу да Беларусі:
«Кожная ўзнагарода зразумела прыцягвае новых гледачоў, пры гэтым розныя фэстывалі маюць сваіх гледачоў, напрыклад, так, у Вэнэцыі адно кола, а ў Ляйпцыгу — іншае. Тут фэстываль скіраваны больш на праваабарончую тэматыку, гэта іншае кола зацікаўленых. Таму варта паказваць паўсюль, уваходзіць у розныя прасторы. Нямецкая прэм’ера была на кінафэстывалі ў Ляйпцыгу, а гэта быў першы паказ у Бэрліне. І было прыемна бачыць ня толькі нямецкую публіку, а і былых палітзьняволеных у зале, якія маглі таксама выказацца і форма размовы прыняла крыху іншы характар, чым стандартныя сустрэчы пасьля паказаў».
ГЛЯДЗІЦЕ ТАКСАМА:
Фільм Андрэя Куцілы «Лісты» атрымаў на Вэнэцыянскім фэстывалі прэмію ўплыву «Залатога глёбусу»Якія ўзнагароды фільм атрымаў раней
Сёлета ў верасьні фільм Андрэя Куцілы «Лісты» атрымаў на Вэнэцыянскім фэстывалі прэмію ўплыву «Залатога глёбусу» — Golden Globes Impact Prize for Documentary (прыз за сацыяльны ўплыў у дакумэнтальным кіно ад «Залатога глёбусу» ў катэгорыі дакумэнтальнага кіно). Гэтай прэміяй адзначаюць поўнамэтражныя дакумэнтальныя фільмы з афіцыйнай праграмы фэстывалю, якія дэманструюць выдатнае мастацкае майстэрства і адначасова ўзьнімаюць найважнейшыя, вострыя сацыяльныя праблемы, заклікаючы да культурных зьмен.
Апроч таго, «Лісты» атрымалі «Залатога голуба» — галоўную ўзнагароду за лепшы поўнамэтражны дакумэнтальны фільм на на 69-м Міжнародным фэстывалі дакумэнтальнага і анімацыйнага кіно ў Ляйпцыгу (DOK Leipzig) і там жа спэцыяльны прыз тэлерадыёкампаніі Mitteldeutscher Rundfunkо.
Фільм таксама ўвайшоў у кароткі сьпіс прэміі Эўрапейскай кінаакадэміі ў катэгорыі «Лепшы эўрапейскі дакумэнтальны фільм». Фіналісты стануць вядомыя 14 лістапада.
ГЛЯДЗІЦЕ ТАКСАМА:
Фільм Андрэя Куцілы пра рэпрэсіі ў Беларусі трапіў на Вэнэцыянскі міжнародны фэстывальШто вядома пра рэжысэра
Андрэй Куціла нарадзіўся ў 1983 годзе ў Баранавічах (Берасьцейская вобласьць). У 2007 годзе атрымаў ступень па журналістыцы Беларускага дзяржаўнага ўнівэрсытэту. У 2009 годзе скончыў Беларускую дзяржаўную акадэмію мастацтваў. Зьняў больш за 10 фільмаў, ляўрэат шэрагу міжнародных кінапрэмій. Заснавальнік Беларускай незалежнай кінаакадэміі.