Як адзначаецца ў штомесячным маніторынгу ініцыятывы, адпаведныя рашэньне вынесьлі Менскі і Гомельскі абласныя суды, а таксама Мёрскі райвыканкам.
«Два з трох фондаў, датычна якіх ухвалілі рашэньні аб ліквідацыі, прадстаўлялі прадугледжаную заканадаўствам справаздачнасьць за 2023 і 2024 гады. Недзяржаўная ўстанова, датычна якой ухвалілі рашэньне аб прымусовай ліквідацыі раней самастойна ініцыявала працэдуру ліквідацыі, аднак потым скасавала адпаведнае рашэньне», — адзначаецца ў публікацыі.
Апроч таго, у кастрычніку сама меней 6 некамэрцыйных арганізацый ухвалілі рашэньне аб самастойнай ліквідацыі. Паводле экспэртаў, самастойная ліквідацыя, як і раней, фактычна мае прымусовы характар. Гэта абумоўлена маштабам рэпрэсій, неспрыяльным прававым асяродзьдзем, рызыкамі для кіраўнікоў, супрацоўнікаў і чальцоў арганізацый, а таксама немагчымасьцю працягваць дзейнасьць.
Сярод арганізацый, якія самастойна зьліквідаваліся, — асьветніцкі цэнтар «Разум Лайф», зарэгістраваны 22 лютага 2022 году.
ГЛЯДЗІЦЕ ТАКСАМА:
Касьцюгова і Кучынскі паспрачаліся пра санкцыі і палітвязьняўЯкія грамадзкія арганізацыі зьявіліся
Згодна з аналізам дадзеных Адзінага дзяржаўнага рэгістру юрыдычных асобаў і індывідуальных прадпрымальнікаў, з 1 студзеня да канца кастрычніка 2026 году ў Беларусі зарэгістравалі 25 некамэрцыйных арганізацый.
Найбольш зь іх — 13 — недзяржаўных устаноў, у тым ліку 4 — у сфэры абароны жывёл, 3 — сацыяльнай і дабрачыннай накіраванасьці, 2 — культурна-творчай накіраванасьці, 2 установы адукацыі, 2 — спартовай накіраванасьці і 1 — у сфэры разьвіцьця міжрэгіянальных ініцыятыў.
Апроч таго, зарэгістравалі яшчэ прыблізна 12 грамадзкіх арганізацый, у тым ліку, 7 — спартовай накіраванасьці, 2 — моладзевыя арганізацыі, 1 аб’яднаньне абаронцаў і жыхароў блякаднага Ленінграда, 1 аб’яднаньне афіцэраў, і 2 — сфэры міжкультурнай супрацы.
На момант падрыхтоўкі аналізу зьвестак аб рэгістрацыі новых фондаў у 2026 годзе ня выявілі.
ГЛЯДЗІЦЕ ТАКСАМА:
Былых палітвязьняў перасьледуюць за «ўхіленьне ад прэвэнтыўнага нагляду», у тым ліку тых, каго вывезьлі за мяжуКолькі грамадзкіх арганізацый зьліквідавалі за апошнія шэсьць гадоў
На канец кастрычніка 2026 году сукупныя інстытуцыйныя страты сэктару грамадзянскай супольнасьці з пачатку постэлектаральнага крызісу 2020 года склалі сама меней 2090 некамэрцыйных арганізацый.
Згодна з маніторынгам Lawtrend, з 2021 году сама меней 1272 некамэрцыйных арганізацый прымусова зьліквідавалі або знаходзяцца ў працэсе прымусовай ліквідацыі, яшчэ сама меней 818 некамэрцыйных арганізацый ухвалілі рашэньне аб самастойнай ліквідацыі.
Паводле экспэртаў, адным з асноўных інструмэнтаў ціску на грамадзянскую супольнасьць застаецца заканадаўства аб супрацьдзеяньні «экстрэмізму». Працягваецца крымінальны перасьлед за ахвяраваньні ў падтрымку грамадзкіх ініцыятыў, за ўдзел у іх дзейнасьці і супрацу зь імі, а таксама прызнаньне інфармацыйных рэсурсаў арганізацый і іх прадстаўнікоў «экстрэмісцкімі матэрыяламі».