Расейска-ўкраінская гуманітарная місія стартуе зь беларускага пункту пропуску «Новая гута» на мяжы з Украінай.
Як паведаміў дзяржаўны тэлеканал «Першы інфармацыйны», раніцай у Беларусь прыехаў упаўнаважаны Вярхоўнай рады Ўкраіны ў правах чалавека Дзьмітро Лубінец разам з чатырма амэрыканскімі журналістамі.
У Гомель на самалёце прыбыла таксама і расейская дэлегацыя.
Супрацоўнікі дзяржаўнага тэлеканала асабліва акцэнтавалі на тым, што Беларусь выконвае ўсе дасягнутыя дамоўленасьці па дапамозе ў ажыцьцяўленьні гэтай гуманітарнай місіі і што першымі аб беларускім удзеле паведамілі менавіта амэрыканскія журналісты.
ГЛЯДЗІЦЕ ТАКСАМА:
Замірэньне вакол Алешак працягваецца: прыфрантавы Херсон упершыню за некалькі гадоў не бамбіліШто паведамілі ва Ўкраіне
Упаўнаважаны Вярхоўнай рады Ўкраіны ў правах чалавека Дзьмітро Лубінец у сваім Telegram-канале адзначыў, што цяпер па маршруце гуманітарнай місіі адбываецца разьмінаваньне. «Паралельна ўжо фарміруем гуманітарны груз, які плянуем даставіць у Алешкі заўтра», — паведаміў ён.
Паводле яго, абодва бакі выконваюць умовы рэжыму цішыні, які распачаўся 27 кастрычніка. «Рэжым цішыні працягваецца 54 гадзіны. [...] Гэта стала магчымым, у тым ліку, дзякуючы сталай камунікацыі з упаўнаважанай Расеі ў правах чалавека Янай Лантратавай. [...] Асобна дзякую першай лэдзі ЗША Мэланіі Трамп, якая асабіста надае свой час і ўвагу гуманітарнай місіі і дапамозе цывільным людзям у Алешках», — адзначыў ён.
«Наша задача — даставіць гуманітарную дапамогу людзям, якія застаюцца ў горадзе, і забясьпечыць магчымасьць бясьпечнага выезду цывільных», — адзначыў ён.
У той жа час ён не ўдакладніў маршрут місіі і якім чынам ён будзе ажыцьцяўляцца — празь Беларусь і далей ўкраінскую тэрыторыю ці празь Беларусь у Расею і далей праз расейскую тэрыторыю.
ГЛЯДЗІЦЕ ТАКСАМА:
Мэланія Трамп: «Геаграфічная зона замірэньня пашыраная за межы Алешак»Што паведамілі ў Расеі
Упаўнаважаная Расеі ў правах чалавека Яна Лантратава разьмясьціла ў сваім Telegram-канале аналягічны тэкст аб разьмінаваньні, выкананьні бакамі рэжыму спыненьня агню і з падзякай Мэланіі Трамп.
У той жа час яна паведаміла, што гуманітарную дапамогу ў Алешкі ўжо адправілі. «Людзям патрэбныя ежа, паліва, мэдыкамэнты, сродкі гігіены», — сказала яна.
Прадстаўніца Расеі адзначыла, што кожны чалавека атрымае магчымасьць выехаць з зоны баявых дзеяньняў. Аднак, яна, як і Лубінец, не ўдакладніла маршрут руху місіі.
ГЛЯДЗІЦЕ ТАКСАМА:
Кіеў і Масква дамовіліся спыніць агонь у Алешках з ночы на 27 кастрычнікаЧаму гэта важна
Алешкі трапілі пад расейскую акупацыю ўжо ў першыя дні поўнамаштабнага ўварваньня. Горад месьціцца на левым беразе Дняпра, і цяпер гэта натуральная мяжа паміж свабоднай і акупаванай часткамі Херсонскай вобласьці.
Паводле Херсонскай абласной вайсковай адміністрацыі, у Алешках застаюцца каля 2 тысяч чалавек, у тым ліку амаль 50 дзяцей. Адміністрацыя гаворыць, што расейскія войскі перашкаджаюць дастаўцы дапамогі і фактычна пазбаўляюць жыхароў магчымасьці пакінуць горад.
Там ад пачатку акупацыі няма электрычнасьці, газу, а пасьля падрыву Кахоўскай ГЭС — і пітной вады. Эвакуавацца немагчыма: дарогі замінаваныя.
Спроба міжнародных арганізацыяў дамовіцца з расейскімі ўладамі пра эвакуацыю цывільных жыхароў дагэтуль не давала вынікаў.