«Нам вядома пра паведамленьні наконт сьмяротнага выпадку з падазрэньнем на лёгачную чуму ў Іркуцкай вобласьці Расеі, — паведаміў 4 кастрычніка прадстаўнік Дзяржаўнага дэпартамэнту ў камэнтары для RFE/RL. — Мы ўважліва сочым за сытуацыяй супольна з Цэнтрам кантролю і прафіляктыкі захворваньняў (CDC) і іншымі нашымі партнэрамі з розных ведамстваў».
Як паведаміла Радыё Свабодная Эўропа / Радыё Свабода, Дзяржаўны дэпартамэнт заклікаў расейскія ўлады «хутка і адкрыта абменьвацца дакладнай інфармацыяй», адзначыўшы пры гэтым, што чума паддаецца лячэньню агульнадаступнымі антыбіётыкамі, асабліва калі лячэньне пачынаецца на раньняй стадыі.
Прадстаўнік Міністэрства аховы здароўя і сацыяльных службаў ЗША таксама пацьвердзіў, што Цэнтар кантролю і прафіляктыкі супрацоўнічае зь Дзяржаўным дэпартамэнтам.
Прэс-сакратар заявіў, што бясьпека грамадзян ЗША застаецца «найвышэйшым прыярытэтам» ведамства. Белы дом таксама сочыць за падзеямі і карантыннымі захадамі ў Расеі. Высокія службоўцы адміністрацыі заявілі журналістам, што ўрад ведае аб гэтых паведамленьнях і разглядае магчымае на іх рэагаваньне.
Цяпер паміж ЗША і Расеяй няма простых камэрцыйных рэйсаў, і Вашынгтон не абвясьціў дадатковых абмежаваньняў на паездкі ў сувязі з гэтым выпадкам.
Занепакоенасьць узмацняецца
Гэтыя паведамленьні выклікалі занепакоенасьць у некаторых амэрыканскіх заканадаўцаў і колішніх службоўцаў, у тым ліку з нагоды гісторыі дасьледаваньняў біялягічнай зброі ў Расеі.
Дэпутат Палаты прадстаўнікоў Дон Бэйкан (рэспубліканец ад штату Нэбраска), высокапастаўлены сябра Камітэту ўзброеных сілаў Палаты прадстаўнікоў, зьвязаў гэтыя паведамленьні з даўнімі абвінавачваньнямі Расеі ў тым, што падтрыманыя ЗША лябараторыі ва Ўкраіне былі ўцягнутыя ў дасьледаваньні біялягічнай зброі.
«Я памятаю, як чуў антыўкраінскія галасы пра іхныя так званыя біялябараторыі. Гэта быў выдатны прыклад расейскай апэрацыі дэзынфармацыі. Але насамрэч гэта Расея мае біялябараторыі», — напісаў Бэйкан у сацыяльных сетках.
Расея даўно абвінавачвае Вашынгтон і Кіеў у стварэньні аб’ектаў біялягічнай зброі ва Ўкраіне. Абодва ўрады адхіляюць гэтыя абвінавачваньні, а незалежныя расьсьледаваньні не знайшлі адпаведных доказаў.
Савецкі Саюз падчас халоднай вайны падтрымліваў маштабную наступальную праграму стварэньня біялягічнай зброі, нягледзячы на тое, што быў удзельнікам Канвэнцыі аб забароне біялягічнай зброі 1972 году. Перабежчыкі і наступныя расьсьледаваньні задакумэнтавалі, што расейскія вайсковыя структуры вывучаюць патагены, у тым ліку чуму, а таксама робяць крокі ў распрацоўцы штамаў, устойлівых да антыбіётыкаў.
Гэтая гісторыя стала часткай палітычных дэбатаў вакол іркуцкай справы. Але няма публічных доказаў таго, што лябараторыя, якая ўдзельнічала ў цяперашнім інцыдэнце, распрацоўвала ўзбуджальніка чумы як зброю або што сьмерць супрацоўніцы была зьвязана з наступальнай праграмай стварэньня біялягічнай зброі.
Колішні рэспубліканец Адам Кінзінгер з Ілінойсу асобна заклікаў да масавага прыпыненьня авіяперавозак з удзелам Расеі. «Увесь сьвет павінен забараніць усе рэйсы ў Расею і з Расеі», — напісаў Кінзінгер у сацыяльных сетках.
Пазьней ён заклікаў спыніць палёты з Расеі і забараніць расейцам уезд у іншыя краіны да высьвятленьня сытуацыі.
ГЛЯДЗІЦЕ ТАКСАМА:
Антыфэйк. Расея гаворыць пра чуму і халеру, а доказам выстаўляе кішэчную палачкуШто здарылася ў Іркуцку?
У цэнтры падзеяў — 28-гадовая Дарʼя Шыпілава, лябарантка Іркуцкага супрацьчумнага інстытуту.
Незалежнае сібірскае выданьне «Люди Байкала» паведаміла, што 25 верасьня, працуючы ў інстытуце, Шыпілава выпадкова разьбіла прабірку з бактэрыямі лёгачнай чумы.
Паводле выданьня, яна цяжка захварэла і памерла 2 кастрычніка. Расейскія ўлады публічна не пацьвердзілі гэтую вэрсію. Агенцтва «Роспотребнадзор» паведаміла, што ў Шыпілавай дыягнаставалі «пнэўманію нявызначанай этыялёгіі».
У ведамстве адзначылі, што ў сувязі з прафэсійнай дзейнасьцю пацыенткі былі праведзены дадатковыя дасьледаваньні, аднак мікраарганізмаў, зьвязаных з яе працай, выяўлена не было. «Роспотребнадзор» таксама заявіў, што ў інстытуце не зафіксавалі ніякіх інцыдэнтаў, зьвязаных з патагеннымі мікраарганізмамі.
Тым ня менш улады прынялі меры засьцярогі. Каля 200 чалавек, якія маглі кантактаваць з Шыпілавай, зьмясьцілі пад мэдычнае назіраньне або ізалявалі, а ў лякарнях рэгіёну ўвялі абмежаваньні. Гэтыя захады справакавалі домыслы, бо расейскія афіцыйныя асобы спачатку ўнікалі публічных згадак пра чуму, тады як у мясцовых і незалежных паведамленьнях гаварылася пра магчымы лябараторны інцыдэнт з удзелам Yersinia pestis — бактэрыі, якая выклікае чуму.
«Роспотребнадзор» ацаніў эпідэмічную сытуацыю ў Іркуцку і суседнім горадзе Шэлехаве як «стабільную».
ГЛЯДЗІЦЕ ТАКСАМА:
Fox News назваў супрацоўніка вірусалягічнай лябараторыі Ўханя нулявым пацыентам COVID-19Што такое лёгачная форма чумы?
Узбуджальнік чумы — бактэрыя Yersinia pestis, якая звычайна цыркулюе сярод дзікіх грызуноў і блох. Лёгачная форма хваробы наносіць шкоду лёгкім і можа перадавацца ад чалавека да чалавека паветрана-кропельным шляхам пры шчыльным кантакце.
Хвароба можа разьвівацца імкліва, аднак сучасныя антыбіётыкі вельмі эфэктыўныя пры своечасовым пачатку лячэньня.
Магчымасьць таго, што гэта лёгачная форма чумы, тлумачыць рашэньне выявіць і ўзяць пад назіраньне людзей, якія мелі цесны кантакт з Шыпілавай. Аднак меры карантыну і назіраньня ня сьведчаць, што ў яе сапраўды была чума ці што адбыўся сполах захворваньня. На гэты момант няма афіцыйна пацьверджаных зьвестак пра шырэйшае распаўсюджваньне інфэкцыі сярод жыхароў Іркуцку.