Злучаныя Штаты маюць новыя інструмэнты, каб узмацніць эканамічны ціск на Расею, але іх уплыў будзе залежаць ад таго, ці будзе адміністрацыя Трампа выкарыстоўваць іх пасьлядоўна і ці дасьць яна ясна зразумець, чаго хоча ад Масквы і іншых урадаў, заявіў былы амэрыканскі дыплямат Дэніэл Фрыд у інтэрвію карэспандэнту Радыё Свабодная Эўропа/Радыё Свабода Алексу Раўфоглу.
«Адміністрацыя павінна перастаць пасылаць супярэчлівыя сыгналы», — сказаў Фрыд у інтэрвію 29 верасьня, падкрэсьліўшы, што нядаўна прыняты ў ЗША закон аб санкцыях супраць Расеі можа даць Вашынгтону значны рычаг уплыву на Маскву, калі ён будзе рэалізаваны ў каардынацыі з саюзьнікамі.
Фрыд, чыя кар’ера ў сфэры нацыянальнай бясьпекі ахоплівала сем адміністрацый ЗША, у тым ліку на пасадах пасла ЗША ў Польшчы і каардынатара Дзяржаўнага дэпартамэнту ў пытаньнях палітыкі санкцый, кажа, што закон дае адміністрацыі інструмэнты, каб узьдзейнічаць на даходы Расеі ад энэрганосьбітаў і на краіны, якія працягваюць купляць расейскую нафту і газ.
«Патрэбны момант — менавіта цяпер», — сказаў Фрыд, які сышоў з Дзяржаўнага дэпартамэнту ў 2017 годзе.
Фрыд кажа, што калі б ён усё яшчэ працаваў каардынатарам у пытаньні санкцыяў, ён бы езьдзіў у такія краіны, як Кітай і Індыя, каб абмеркаваць скарачэньне іх закупак расійскіх энэрганосьбітаў і дамовіцца аб тым, каб зьменшыць іх залежнасьць ад Масквы.
«Закон Ліндсі Грэма» аб санкцыях супраць Расеі і Ірану, падпісаны прэзыдэнтам Дональдам Трампам 18 верасьня, накіраваны супраць расейскіх чыноўнікаў, банкаў, энэргетычнага сэктару і суднаў, зьвязаных з так званым «ценявым флётам» Расеі — танкерамі, якія выкарыстоўваюцца для абыходу санкцый. Ён таксама надзяляе адміністрацыю паўнамоцтвамі ўводзіць мыты ў дачыненьні да краін, якія працягваюць значныя закупкі расейскай нафты і газу.
Па словах Фрыда, закон не ідэальны, але прадугледжвае дастатковую гнуткасьць, каб быць карысным.
«Трэба дамагчыся таго, каб гэты закон скараціў даходы Пуціна ад продажу нафты і газу, — адзначыў Фрыд. — Калі гэтага ўдасца дасягнуць, значыць, справа зроблена».
Фрыд таксама дадаў, што санкцыі могуць паўплываць на Расею ўскосна, прымушаючы яе прадаваць нафту з большай зьніжкай. «Калі яны будуць так рабіць, то кожны даляр, які яны недаатрымаюць, — посьпех для гэтага закону», — сказаў ён.
Аднак, кажа Фрыд, закон будзе мець абмежаваны эфэкт, калі іншыя сыгналы з Вашынгтону будуць сьведчыць, што адміністрацыя больш занепакоеная захаваньнем паставак расейскай энэргіі на сусьветныя рынкі, чым скарачэньнем даходаў Масквы.
Ён згадвае камэнтары прэзыдэнта Трампа аб тым, што ўкраінскія напады на расейскія нафтаперапрацоўчыя заводы спрыяюць росту цэн на дызэльнае паліва. «Гэта пасылае супярэчлівы сыгнал, што мы сапраўды хочам бачыць больш расейскай нафты і дызэльнага паліва на рынку, а ня менш», — сказаў Фрыд.
Паводле Фрыда, такія сыгналы з Вашынгтону «супярэчаць закону, але, што больш важна, падрываюць добрую палітыку».
Новае выпрабаваньне для палітыкі Вашынгтону адносна Расеі
Камэнтары Фрыда прагучалі на фоне паведамленьняў пра магчымае пашырэньне амэрыкана-расейскіх эканамічных дыскусій паралельна з дыпляматычнымі намаганьнямі спыніць вайну Расеі супраць Украіны.
Выданьне The Atlantic паведаміла, што спэцыяльны прадстаўнік ЗША Джон Коўл прапанаваў плян, паводле якога Расея магла б вызваліць сваіх палітвязьняў у абмен на пэўнае зьмякчэньне санкцый. Паводле інфармацыі выданьня, гэтая прапанова была ўпершыню агучана некалькі месяцаў таму і пакуль знаходзіцца на пачатковай стадыі разгляду.
Гэтая ініцыятыва патэнцыйна магла б адкрыць шлях да аднаўленьня амэрыкана-расейскага эканамічнага ўзаемадзеяньня, нягледзячы на тое, што вайна працягваецца, адзначае The Atlantic.
Дзяржаўны дэпартамэнт ЗША публічна не пракамэнтаваў гэтае паведамленьне.
Коўл ужыў падобны падыход у адносінах да Беларусі, якая вызваліла каля 500 палітвязьняў у абмен на зьмякчэньне санкцый. Вашынгтон таксама пачаў перамовы з уладамі Беларусі наконт пашырэньня эканамічных сувязяў, у тым ліку магчымай закупкі ЗША беларускіх калійных угнаеньняў.
Расея далучылася да гэтых абмеркаваньняў, паколькі эўрапейскія санкцыі могуць вымусіць перавозіць беларускі калій для такіх паставак праз расейскую тэрыторыю, паведамляе The Atlantic.
Тым часам Кірыл Дзьмітрыеў, высокапастаўлены прадстаўнік прэзыдэнта Расеі Ўладзіміра Пуціна, сустрэўся з пасланьнікам Трампа Джарэдам Кушнерам 28 верасьня; гэтую інфармацыю пацьвердзіў Радыё Свабода высокапастаўлены прадстаўнік адміністрацыі ЗША на ўмовах ананімнасьці. Чыноўнік не паведаміў дадатковых падрабязнасьцяў.
Паведамляецца, што 29 верасьня Дзьмітрыеў сустракаўся з прадстаўнікамі Міністэрства фінансаў і Міністэрства энэргетыкі ЗША.
Дзьмітрыеў зьяўляецца ключавым расейскім суразмоўцам у кантактах з адміністрацыяй Трампа; раней ён удзельнічаў у абмеркаваньнях пытаньняў эканомікі і энэргетыкі, а таксама намаганьняў па ўрэгуляваньні вайны.
Фрыд адзначыў, што гнуткасьць новага закону аб санкцыях можа быць карыснай менавіта таму, што Вашынгтон мае магчымасьць спалучаць эканамічны ціск з перамовамі. Ён дадаў, што Злучаным Штатам варта паведаміць іншым урадам пра свой намер гарантаваць выкананьне абмежаваньняў, адначасова прапаноўваючы ім шляхі, як скараціць закупкі расейскіх энэрганосьбітаў.
Фрыд таксама падкрэсьліў важнасьць узаемадзеяньня з эўрапейскімі ўрадамі і краінамі «Вялікай сямёркі» (G7). «Паведамленьне толькі ад Амэрыкі будзе мець меншую вагу, чым паведамленьне ад усіх эканамічных слупоў свабоднага сьвету», — сказаў Фрыд.
ГЛЯДЗІЦЕ ТАКСАМА:
Трамп вылучыў Коўла на пасаду спэцпрадстаўніка ў справах закладнікаўЗаканадаўцы заклікаюць узмацніць ціск
Магчымасьць паслабленьня санкцый выклікала пярэчаньні з боку амэрыканскіх заканадаўцаў, якія выступаюць за захаваньне эканамічнага ціску на Маскву.
Сэнатар ад штату Ілінойс Дык Дурбін, вядучы прадстаўнік Дэмакратычнай партыі ў Юрыдычным камітэце Сэнату, заявіў Радыё Свабода 29 верасьня пра свой спадзеў, «што прэзыдэнт скарыстаецца сваімі паўнамоцтвамі ў адпаведнасьці з Законам аб санкцыях, каб запатрабаваць ад асноўных гандлёвых партнэраў Расеі» выконваць новыя меры ЗША.
Двухпартыйная група Кангрэсу ў пытаньнях Украіны таксама заявіла 29 верасьня, што Злучаныя Штаты павінны працягваць узмацняць санкцыйны ціск на Расею, пакуль працягваецца яе поўнамаштабнае ўварваньне ва Ўкраіну.
Гэтую заяву зрабілі чатыры сустаршыні групы: члены Палаты прадстаўнікоў ад Дэмакратычнай партыі Марсі Каптур (штат Агаё) і Майк Куіглі (штат Ілінойс), а таксама члены Палаты прадстаўнікоў ад Рэспубліканскай партыі Браян Фіцпатрык (штат Пэнсільванія) і Джо Ўілсан (штат Паўднёвая Караліна).
«Два тыдні таму Кангрэс прыняў найбольш значны закон аб санкцыях супраць Расеі з 2017 году», — адзначылі заканадаўцы.
«Пакуль працягваецца поўнамаштабнае ўварваньне Расеі з мэтай захопу Ўкраіны і пагрозы нашым эўрапейскім саюзьнікам, Злучаныя Штаты павінны рабіць усе неабходныя крокі, каб спыніць ваеннага злачынцу Ўладзіміра Пуціна».
Яны адрэагавалі, у прыватнасьці, на паведамленьні пра тое, што адміністрацыя разглядае магчымасьць паслабленьня санкцый у абмен на вызваленьне палітвязьняў.
«Паслабленьне санкцый падбадзёрыць Расею і зацягне вайну», — заявілі заканадаўцы.