Інтэрнэт-старонку турыстычнага апэратара Tez Tour у Беларусі ўзламалі. Хакеры апублікавалі паведамленьне пра зьнішчэньне зьвестак.
Невядомыя сьцьвярджаюць, што атрымалі доступ да вялікіх аб’ёмаў канфідэнцыйнай інфармацыі турфірмы. Афіцыйнага пацьверджаньня ўзлому ці выцеку даных пакуль няма.
У паведамленьні праломнікі пішуць, што ўзламалі сэрвэры кампаніі і выдалілі зьвесткі. Асобна яны зьвярнуліся да кліентаў Tez Tour і заявілі, што ў іхных руках апынуліся пашпартныя зьвесткі, даныя банкаўскіх картак, тэлефоны, адрасы і іншая інфармацыя.
Таксама ў хакерскім пасланьні прысутнічаюць непрыстойныя словы і паведамленьне, што з 15 верасьня турфірма спыніла існаваньне.
Адна з чытачак «Нашай нівы» патэлефанавала ў Tez Tour, і там адказалі, што на сайце адбываюцца тэхнічныя працы і што заўтра ўсё будзе працаваць. Заклікалі не хвалявацца, заявілі, што выцеку даных не адбылося і паабяцалі, што ў хуткім часе можна будзе зноў браняваць туры.