У агульнай аўдыенцыі папы Льва XIV на плошчы Сьвятога Пятра ў Ватыкане ў сераду ўдзельнічаў былы палітвязьнь, журналіст Анджэй Пачобут, паведамілі Vaticannews.
Пасьля ейнага заканчэньня ён сустрэўся з папам і паразмаўляў зь ім.
Анджэй Пачобут трымаў у руках абраз Маці Божай Кангрэгацкай.
«Я прасіў блаславеньня для Беларусі, для маёй сям’і, для маёй вялікай сям’і — Саюзу палякаў Беларусі, а таксама папрасіў блаславіць сьвяты абраз Маці Божай Кангрэгацкай, які некалькі стагодзьдзяў таму трапіў з Апостальскай сталіцы ў Горадню. Там ён ёсьць сымбалем польскага каталіцызму. Пазьней абраз быў каранаваны паводле рашэньня Яна Паўла II. Я прасіў блаславіць копію гэтага абраза. Адну я падарыў папу і папрасіў пра блаславеньне. Гэты абраз вернецца ў Горадню і будзе разам з Саюзам палякаў», — расказаў Пачобут PAP.
«Я вельмі ўдзячны папу за той спакой, які цяпер адчуваю. Неўзабаве я вярнуся ў Беларусь, і ўнутранае напружаньне назапашвалася. Апошнія месяцы былі вельмі насычанымі. Цяпер я адчуваю спакой», — адзначыў былы палітвязень.
ГЛЯДЗІЦЕ ТАКСАМА:
Пачобут: «Я хачу дадому і паеду дадому»Хто такі Анджэй Пачобут
- Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі.
- Нарадзіўся 17 красавіка 1973 году ў Вялікай Бераставіцы (Горадзенская вобласьць). Яму 49 гадоў. Жыве ў Горадні. Жанаты, двое дзяцей: старэйшая дачка вучыцца ў Горадні ў мэдычным унівэрсытэце, малодшы сын ходзіць у школу.
- У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
- 25 сакавіка 2021 году Андрэя Пачобута затрымалі, прыйшоўшы да яго зь ператрусам.
- Трох фігурантак «польскай справы» Ірэну Бярнацкую, Марыю Цішкоўскую і Ганну Панішаву у траўні 2021 вызвалілі ўзамен на выезд зь Беларусі. Пачобут адмовіўся ад такой прапановы. Старшыню Анжаліку Борыс у сакавіку 2022 вызвалілі зь СІЗА пад хатні арышт.
- У Анджэя хворае сэрца. Раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.
- За артыкул пра напад СССР на Польшчу ў верасьні 1939-га Анджэя Пачобута абвінавацілі ў «распальваньні варожасьці па нацыянальнай прыкмеце». У публікацыі Пачобут назваў напад СССР на Польшчу 17 верасьня 1939 году агрэсіяй. Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
- У 2023-м Пачобуту вынесьлі прысуд — 8 гадоў калёніі. 21 чэрвеня стала вядома, што палітвязьня перавялі ў наваполацкую калёнію № 1.
- 28 красавіка 2026 году быў вызвалены і вывезены ў Польшчу ў рамках абмену зьняволенымі.