У Аўстрыі выкрылі схему незаконных паставак у Расею тавараў вайсковага прызначэньня. Венская кампанія пастаўляла абсталяваньне, якое выкарыстоўвалася для вытворчасьці рухавікоў для расейскіх ракет і зьнішчальнікаў. Гэта парушэньне санкцый Эўрапейскага зьвязу, паведаміла агенцтва Reuters з спасылкай на Міністэрства ўнутраных спраў Аўстрыі.
Кампанія фальсыфікавала сэртыфікаты канцавога адрасату пастаўкі абсталяваньня, якое знаходзіцца пад санкцыямі.
Сярод прадукцыі былі спэцыяльныя мэталаапрацоўчыя інструмэнты і станкі зь лічбавым праграмным кіраваньнем (ЛПК), якія можна выкарыстоўваць для вырабу дэталяў і інструмэнтаў.
У МУС Аўстрыі дадалі, што кіраўніком прадпрыемства быў беларус. 28-гадовага мужчыну арыштавалі яшчэ ў траўні, ён пад сьледзтвам і застаецца пад вартай. Ягонага імя не называюць.
Кампанія, імя якой міністэрства не назвала, хавала свае пастаўкі празь сетку падстаўных кампаній у Турэччыне, Аб’яднаных Арабскіх Эміратах, Ганконгу, Беларусі, Кыргызстане, Паўднёвай Карэі, Польшчы і Літве, высьветліла сьледзтва.
«Недапушчальна, каб высокадакладныя эўрапейскія тэхналёгіі былі накіраваныя на вытворчасьць крылатых ракет і сыстэмаў супрацьпаветранай абароны», — заявіў намесьнік міністра выведкі Аўстрыі Ёрг Ляйхтфрыд.
Ён дадаў, што дзяржава будзе працягваць ісьці на рашучыя меры супраць тых суб’ектаў, якія спрабуюць абыйсьці юрыдычныя забароны на падтрымку расейскай зброевай прамысловасьці.
Міністэрства паведаміла, што абсталяваньне пастаўлялася кампаніям, зьвязаным з расейскім дзяржаўным прамысловым канглямэратам «Растэх».
Апошнія высновы сьледчых ясна паказваюць, што тавары выкарыстоўваліся для вырабу вайсковай тэхнікі, у тым ліку рухавікоў для крылатых ракет і зьнішчальнікаў.
Пасольства Расеі ў Вене адмовілася даць камэнтары журналістам. «Растэх» не адразу адказаў на просьбу аб іх.
У той жа дзень, калі арыштавалі галоўнага падазраванага, улады сканфіскавалі станкі з ЛПК і рыштунак коштам каля 140 000 эўра.
Доказы, вынятыя ў час чатырох рэйдаў у жніўні 2025 году, сьведчаць пра тое, што з 2022 году расейскім вытворцам зброі паставілі прамысловых тавараў на суму больш за 3,3 мільёна эўра, дадалі ў міністэрстве.
Абыход санкцый
З моманту пачатку поўнамаштабнай вайны Расеі супраць Украіны ў лютым 2022 году ў краінах Эўразьвязу і іншых дзяржавах выкрылі шмат незаконнай дзейнасьці, якая дапамагала расейскаму войску. У ёй бралі ўдзел і грамадзяне Беларусі.
Адзін з найбольш сьвежых прыкладаў — Польшча, дзе ў лютым 2026 году арыштавалі чатырох беларусаў і двух палякаў за спробу незаконных паставак у Расею прадукцыі, якая магла б выкарыстоўвацца ў вытворчасьці баявых бесьпілётнікаў. Складнікі спрабавалі незаконна ўвезьці праз тэрыторыю Беларусі, каб яны затым трапілі ў Расею.
Польская пракуратура тады правяла шэраг ператрусаў у краіне, арыштавала падазраваных і спыніла дзеяньне схемы.
Эўразьвяз з пачатку поўнамаштабнай вайны прыняў ужо 21 пакет санкцый, у якія ўключаная і Беларусь. Пільную ўвагу ЭЗ прыцягваюць тавары і паслугі, якія могуць выкарыстоўвацца Расеяй для ўзмацненьня войска і працягу вайны. Парушэньне абмежаваньняў цягне крымінальныя справы, якія заводзяць супраць вінаватых.
ГЛЯДЗІЦЕ ТАКСАМА:
Украіна ўвяла санкцыі яшчэ супраць двух беларускіх прадпрыемстваўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.