Як адзначыла Радыё Свабодная Эўропа / Радыё Свабода, гэта адбылося пасьля таго, як чыноўнікі Міністэрства замежных спраў Ірану заявілі, што яны вядуць перамовы з Аманам аб сумесным кіраваньні гэтым стратэгічным водным шляхам.
«Капітан танкера паведаміў, што чуў два выбухі падчас праходжаньня праз Армускую пратоку», — паведаміла UKMTO на сваёй старонцы на плятформе X.
Інцыдэнт адбыўся за 9 марскіх міль на паўднёвы ўсход ад узьбярэжжа Амана позна ўвечары 5 жніўня.
У арганізацыі дадалі, што, згодна з атрыманым паведамленьнем, экіпаж і судна не пацярпелі, інфармацыю пра шкоду навакольлю не паведамілі.
Іран, які некалькі разоў закрываў Армускую пратоку з пачатку амэрыкана-ізраільскай апэрацыі, раней адкрываў агонь па суднах, якія, як тлумачылі ў Тэгеране, праходзілі па недазволеных маршрутах.
ГЛЯДЗІЦЕ ТАКСАМА:
Трамп заявіў пра «апошні шанец» Ірану пайсьці на мірныя пагадненьні. У Армускай пратоцы зноў абстралялі танкерТрамп настойвае на перамовах, але не выключае ваенных дзеяньняў
Прэзыдэнт ЗША Дональд Трамп 5 жніўня заявіў, што ён аддае перавагу дасягненьню дыпляматычнага пагадненьня з Тэгеранам, чым новым ваенным дзеяньням супраць Ірану.
«Мы альбо заключым зьдзелку, альбо скончым працу. І скончыць працу будзе няцяжка. Я б лепш заключыў зьдзелку, таму што я не хачу, каб гэта паўплывала на 91 мільён чалавек», — сказаў Дональд Трамп у Лас-Вегасе.
Гэтая заява прагучала пасьля таго, як адміністрацыя Трампа паведаміла, што працягне перамовы з Іранам, у тым ліку аб аднаўленьні Армускай пратокі.
ГЛЯДЗІЦЕ ТАКСАМА:
Трамп заявіў, што скасаваў удар па ІранеВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
8 красавіка ўступіла ў сілу замірэньне, але ў рэгіёне Пэрсыдзкай затокі працягваюцца спарадычныя выпадкі гвалту, у тым ліку напады на караблі з боку тэгеранскіх сілаў, як і ўдары ЗША па Іране. Пазьней замірэньне некалькі разоў працягвалі, але штораз парушалі. Адносны спакой наступіў у чэрвені 2026 году, але 25 чэрвеня іранскія сілы атакавалі некалькі караблёў у Армускай пратоцы, якія эвакуавалі зь небясьпечнай зоны.