Паводле апэратыўнага камандаваньня Паветраных сілаў Украіны, расейскія войскі выкарысталі 7 балістычных ракет «Іскандэр-М», якімі нанесьлі ўдар па Кіеве і Кіеўскай вобласьці, а таксама па Палтаўшчыне, і 189 ударных дронаў. Тры ракеты і 174 дроны ўдалося зьбіць, а чатыры ракеты і 11 бесьпілётнікаў пацэлілі ў 12 лякацыяў.
У Міністэрстве абароны Расеі заявілі, што за ноч зьняшкодзілі 660 украінскіх дронаў над шэрагам расейскіх рэгіёнаў.
У Кіеве два чалавекі атрымалі раненьні, у Запароскай вобласьці адзін чалавек загінуў
Ва ўкраінскай сталіцы ад расейскага абстрэлу пацярпеў Дарніцкі раён. Паводле гарадзкіх уладаў, у выніку падзеньня аскепкаў зьбітай ракеты загарэўся склад. Два чалавекі параненыя. Пажар тушылі больш за дзьве гадзіны.
У Сумах расейскія ўдары лучылі ў 9-павярховы жылы дом і аўтамабільную стаянку. Аб пацярпелых не паведамляюць. Ратаўнікі мусілі эвакуаваць 40 чалавек.
У Запароскай вобласьці — адзін чалавек загінуў і 10 чалавек параненыя. Расейскія войскі цягам апошніх 24 гадзін нанесьлі ўдары па 44 паселішчах вобласьці.
У Херсонскай вобласьці ад расейскіх абстрэлаў пацярпелі 42 населеныя пункты, 14 чалавек атрымалі раненьні, у тым ліку адно дзіця.
У Краменчуку Палтаўскай вобласьці пацярпела энэргетычная інфраструктура. Паводле ўладаў, людзі не пацярпелі.
ГЛЯДЗІЦЕ ТАКСАМА:
У Запарожжы ад расейскіх абстрэлаў пацярпелі больш за 20 чалавек, Украіна нанесла новыя ўдары па НПЗ у РасеіУ Расеі ўкраінскія дроны пацэлілі ў хімічнае прадпрыемства
Губэрнатар Тульскай вобласьці Расеі Дзьмітрый Міляеў паведаміў, што ў выніку атакі ўкраінскімі дронамі пашкоджаныя лініі электраперадач і прамысловае прадпрыемства ў Новамаскоўску.
У Шчокінскім раёне пашкоджаны прыватны дом, пацярпела яго ўладальніца. Паводле губэрнатара, над рэгіёнам за ноч зьняшкодзілі 73 украінскія дроны.
Украінскія маніторынгавыя каналы паведамляюць, што ў Новамаскоўску пацярпеў хімічны завод «Азот». Вайсковыя крыніцы пакуль не камэнтуюць гэтых удараў. Маштабы пацэльваньня таксама пакуль невядомыя — на апублікаваных відэазапісах відаць густы чорны дым.
ГЛЯДЗІЦЕ ТАКСАМА:
У Расеі пасьля ўкраінскіх удараў загарэліся нафтабаза і хімкамбінатВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.