Як паведаміла дзяржаўнае выданьне news.by, параненых дзяцей транспартуюць на спэцыяльных рэанімабілях у мэдычныя ўстановы Менску.
«Хлопчыка, які быў у цяжкім стане, уначы праапэравалі. Цяпер яго транспартуюць на апаратнай падтрымцы. Усе іншыя пацярпелыя ў прытомнасьці, размаўляюць і адчуваюць сябе лепш. Нягледзячы на аскепкавыя раненьні, прагнозы станоўчыя», — адзначыла выданьне.
Міністар аховы здароўя Беларусі Аляксандар Хаджаеў заявіў, што магчымасьць транспартаваньня параненых дзяцей і аднаго дарослага пацьвердзілі лекары.
«Цяпер эвакууюць шасьцёх пацярпеых. Зь іх двое цяжкія: адно дзіця і адзін дарослы. І чатыры чалавекі ў стане рознай ступені цяжкасьці, але не цяжкія», — сказаў міністар.
Згодна з інфармацыяй Міністэрства здароўя Беларусі, пецярых дзяцей накіруюць у Рэспубліканскі навукова-практычны цэнтар дзіцячай хірургіі, а дарослага — у Галоўны вайсковы мэдычны клінічны цэнтар № 432 Узброеных сіл Беларусі.
ГЛЯДЗІЦЕ ТАКСАМА:
Аўтобус зь беларускімі дзецьмі трапіў пад атаку ў Расеі. 1 чалавек загінуў, 8 пацярпелі. Расея вінаваціць Украіну, Украіна — РасеюУкраіна гатовая далучыцца да празрыстага высьвятленьня абставінаў інцыдэнту
Упаўнаважаны Вярхоўнай Рады Ўкраіны Дзьмітро Лубінец заявіў, што Ўкраіна ня мае дачыненьня да атакі аўтобуса зь беларускімі дзецьмі.
«У сувязі з пашырэньнем інфармацыі пра атаку на аўтобус зь дзецьмі ў Бранскай вобласьці тэрмінова зьвязаўся зь беларускім бокам і атрымаў першасную інфармацыю аб гэтым інцыдэнце. Падчас размовы асобна падкрэсьліў: Украіна ня мае ніякага дачыненьня да гэтай падзеі», — паведаміў Дзьмітро Лубінец у сваім Telegram-канале.
Паводле яго, сілы абароны Ўкраіне не наносяць удараў па цывільных аб’ектах і цывільным насельніцтве.
«На тэрыторыі Расейскай Фэдэрацыі ўкраінскія вайскоўцы цэляцца выключна ў вайсковыя цэлі. У адрозьненьне ад Расеі, якая штодня атакуе ўкраінскія гарады, жылыя дамы і забівае мірных грамадзян, Украіна дзейнічае ў межах нормаў міжнароднага гуманітарнага права. Не выключаю, што мова ідзе пра чарговую правакацыю або інфармацыйную апэрацыю, выгадную найперш Расейскай Фэдэрацыі», — заявіў украінскі амбудсмэн.
ГЛЯДЗІЦЕ ТАКСАМА:
Ад 922 рублёў за 11 дзён на моры ў Расеі: Як беларусам прапануюць адпачыць у зоне атакі дронаўШто адбылося напярэдадні
17 чэрвеня кіраўнік Бранскай вобласьці Расеі Ягор Кавальчук заявіў, што ў выніку «абстрэлу з боку ўкраінскіх сілаў» пацярпеў аўтобус, у якім дзіцячая футбольная каманда з Гомля ехала на адпачынак у расейскі Геленджык. Адзін чалавек загінуў і яшчэ 8 атрымалі раненьні, у тым ліку шасьцёра дзяцей — двое зь іх былі ў цяжкім стане.
Здарэньне адбылося каля 11-й гадзіны ў раёне вёскі Рудня Бранскай вобласьці. На фота, распаўсюджаным бранскімі абласнымі ўладамі і дзяржаўнымі СМІ Беларусі, быў аўтобус з выбітымі шыбамі і пашкоджаньнямі, імаверна ад аскепкаў снараду.
Сьледчыя камітэты Расеі і Беларусі завялі крымінальную справу. У Расеі — паводле факту тэрарыстычнага акту.
У МЗС Беларусі асудзілі атаку, але зьвярнулі ўвагу на «неабходнасьць выкананьня парадку арганізацыі выезду групаў грамадзян, асабліва дзяцей, на аздараўленьне і адпачынак у замежныя дзяржавы» і «абавязковасьць безумоўнага выключэньня выезду грамадзян у зоны канфліктаў, баявых дзеяньняў і сумежных зь імі рэгіёнаў».
Ва Ўкраіне зьняпраўдзілі сваю датычнасьць да гэтага інцыдэнту.
ГЛЯДЗІЦЕ ТАКСАМА:
Хто абстраляў аўтобус зь дзецьмі. Чаму беларусы — ня мірныя людзі? Расея хоча заліць Беларусь сваім віномШто папярэднічала
Расея ў лютым 2022 году пачала поўнамаштабную вайну супраць Украіны. Расейскія войскі ўварваліся на ўкраінскую тэрыторыю, у тым ліку і зь Беларусі.
Апошнім часам Украіна ўзмацніла свае ўдары па расейскай тэрыторыі на адлегласьці да 1200 кілямэтраў ад украінскай мяжы. Найперш украінскія сілы атакуюць вайсковыя і энэргетычныя аб’екты, а таксама нафтаперапрацоўчы комплекс. У той жа час здараліся выпадкі, калі аскепкі зьбітых супрацьпаветранай абаронай Расеі снарадаў падалі на жылыя дамы і транспарт.