Як вынікае з апублікаванай на Нацыянальным праўным інтэрнэт-партале Беларусі пастановы, сёлета 17 гаспадарак атрымаюць агулам 105,63 мільёна рублёў.
Найбольш крэдытаў — 43 мільёны рублёў — атрымаюць комплексы ў Магілёўскай вобласьці. У гэтым рэгіёне і сама больш комплексаў — іх сем, але 4 зь іх належаць ААТ «Бабушкіна крынка».
ГЛЯДЗІЦЕ ТАКСАМА:
У Менскай вобласьці плянуюць пабудаваць 111 «прафілякторыяў» для цялят, пра якія казаў Лукашэнка. ФОТАШто папярэднічала
Ільвіную долю ўвагі і свайго працоўнага часу Лукашэнка аддае сельскай гаспадарцы, лічыць яе амаль галоўнай сфэрай эканомікі. Але насамрэч доля сельскай гаспадаркі складае менш за 7% валавога ўнутранага прадукту (ВУП) Беларусі, там працуюць каля 9% ад усіх занятых.
Лукашэнка штогод праводзіць нарады аб разьвіцьці аграпрамысловага комплексу Беларусі. У 2023 годзе ён заявіў, што найбліжэйшымі гадамі ў кожнай вобласьці павінны збудаваць ці рэканструяваць па 10 малочна-таварных комплексаў.
«Нам фэрмы не патрэбныя. Нам патрэбныя малочна-таварныя комплексы, дзе ў палацы стаіць карова, мы атрымліваем чыстае малако і дзяцей можам карміць», — заявіў Лукашэнка на нарадзе 22 верасьня 2023 году.
Лукашэнка мяркуе, што вакол такіх комплексаў павінны стварацца сучасныя ўмовы для жыцьця людзей, уключна з будаўніцтвам жыльля, дарог і інфраструктуры.
Згодна з афіцыйнай статыстыкай, у 2025 годзе прырост вытворчасьці ў сельскай гаспадарцы склаў 0,2%. Пры гэтым у Віцебскай вобласьці вытворчасьць сельскай гаспадаркі зьнізілася на 2,7%, у Менскай — на 2,4%, у Горадзенскай — на 1,7%. Пагалоўе буйной рагатай жывёлы ў 2025 годзе зьнізілася на 3%, у тым ліку кароў — на 2%, а сьвіней — на 1,6%.