У ноч на 12 траўня расейскія войскі аднавілі свае атакі на тылавыя рэгіёны Ўкраіны. Мінулымі днямі расейцы, нягледзячы на абвешчанае іхнымі ўладамі спыненьне агню, наносілі ўдары па памежных і прыфрантавых украінскіх тэрыторыях.
У Днепрапятроўскай вобласьці адзін чалавек загінуў
Улады Днепрапятроўскай вобласьці паведамілі, што ў выніку расейскай атакі загінуў адзін чалавек і чатыры атрымалі раненьні, у тым ліку адзін чалавек паранены ў абласным цэнтры.
«Больш за 20 разоў вораг атакаваў пяць раёнаў вобласьці бесьпілётнікамі, артылерыяй і авіябомбамі», — адзначаецца ў паведамленьні абласных уладаў.
Пацярпелі Нікапальскі, Сінельнікаўскі і Самарскі раёны, а таксама горад Паўладар. Найбольш пашкоджаньняў у жылым і інфраструктурным сэктарах.
Паводле віцэ-прэм’ера Ўкраіны Аляксея Кулебы, пацярпела і чыгуначная інфраструктура ў Днепрапятроўскай вобласьці. Пашкоджаны лякаматыў і вагоны, паранены машыніст.
Расейскія войскі не спыняюць атакі суседняй Запароскай вобласьці. Гэты рэгіён абстрэльваюць з усіх відаў узбраеньня — з баявой авіяцыі, артылерыі і дронамі. За апошнія 24 гадзіны расейскія войскі нанесьлі 731 удар па 24 паселішчах рэгіёну.
У Херсонскай вобласьці 12 параненых, у тым ліку адно дзіця
Улады Херсонскай вобласьці паведамілі, што расейскія войскі канцэнтравалі свае ўдары на сацыяльных аб’ектах і інфраструктуры ў 28 паселішчах.
Пашкоджаныя адзін шматпавярховы дом і 5 прыватных, аўтазапраўка, сельгастэхніка і прыватныя аўтамабілі. 12 чалавек параненыя, у тым ліку адно дзіця.
У Кіеве і Кіеўскай вобласьці разбурэньні ў жылым сэктары
У Кіеве, у Абалонскім раёне, аскепкі расейскага дрону ўпалі на дах 16-павярховага жылога дому і выклікалі пажар. У выніку пашкоджаны тэхнічны паверх. Паводле сталічных уладаў, ніхто не пацярпеў.
У Фастаўскім раёне Кіеўскай вобласьці ў выніку пацэльваньня дрону загарэўся дах дзіцячага садка, а ў суседнім жылым доме павыбівала шыбы. Пашкоджаныя два прыватныя дамы. Як паведамілі ўкраінскія ратаўнікі, пацярпелых няма. Цяпер апэратыўныя службы ліквідуюць наступствы ўдару.
Пад безупыннымі інтэнсіўнымі абстрэламі знаходзяцца памежныя з Расеяй рэгіёны — Сумская і Харкаўская вобласьці. Там шмат разбурэньняў. Улады высьвятляюць, ці ёсьць пацярпелыя.
У Пермі пажар на станцыі «Транснефть» спыніўся на 12-ы дзень пасьля апошняга ўдару Ўкраіны
Расейская служба Радыё Свабода апублікавала спадарожнікавыя здымкі нафтапампавальнай станцыі кампаніі «Транснефть» у горадзе Перм. На іх відаць вынікі некалькіх украінскіх удараў па гэтым аб’екце. Цалкам зьнішчаныя шэсьць рэзэрвуараў.
«Фактычны вывад станцыі з ладу яшчэ больш ускладніць сытуацыю на Пермскім НПЗ, які атрымліваў з гэтай станцыі сыравіну. За час пажару на станцыі гэты нафтаперапрацоўчы завод некалькі разоў цярпеў ад украінскіх атак, у выніку якіх на ім вывелі з ладу ўстаноўку першаснай перапрацоўкі нафты АВТ-4», — адзначаецца ў публікацыі.
Украінскія войскі некалькі дзён запар, пачынаючы з 29 красавіка, атакавалі гэтыя расейскія аб’екты.