Напярэдадні меркаванага прыпыненьня баявых дзеяньняў да Дня Перамогі 9 траўня Расея і Ўкраіна зафіксавалі чарговыя паветраныя атакі. Ёсьць ахвяры сярод цывільных у Палтаўскай вобласьці.
Бесьпілётнікі, як мяркуецца, пашкодзілі нафтаперапрацоўчы завод у Кірышах у Ленінградзкай вобласьці Расеі. Мясцовы губэрнатар Аляксандр Дразьдзенка заявіў пра пажар у прамысловай зоне Кірышаў. Там знаходзіцца адзін з найбуйнейшых НПЗ Расеі, які раней ужо пацярпеў ад украінскіх удараў, піша Ўкраінская служба Радыё Свабода.
Пра пажары на нафтаперапрацоўчым заводзе «Киришинефтеоргсинтез» у Ленінградзкай вобласьці пасьля начной атакі паведаміла выданьне ASTRA.
У ноч на 5 траўня жыхары расейскага рэгіёну Чувашыі таксама паведамілі пра выбухі. ASTRA прааналізавала відэазапісы відавочцаў з месца здарэньня і зрабіла выснову, што быў атакаваны завод «ВНИИР-Прогресс» у Чэбаксарах.
Гэтае прадпрыемства вырабляе антэны Comet, якія выкарыстоўваюцца, у прыватнасьці, ва ўдарных БПЛА Shahed, уніфікаваных модулях плянэраваньня і карэкцыі для кіраваных авіяцыйных бомбаў (КАБ).
Агулам у ноч на 5 траўня прынамсі ў 18 рэгіёнах Расеі была ракетная трывога, у 18 аэрапортах былі ўведзеныя абмежаваньні на палёты. У Ханты-Мансійскай аўтаномнай акрузе Расеі ракетную трывогу ўпершыню аб’явілі ў ноч на 5 траўня. Гэты рэгіён разьмешчаны за 2000 кілямэтраў ад украінскай мяжы.
Міністэрства абароны Расеі пакуль не дае зьвестак аб атаках. Украінскі бок не камэнтуе паведамленьняў пра гэтыя атакі на Расею.
Расея атакавала Ўкраіну, ёсьць ахвяры
Расейскія войскі ўначы атакавалі Палтаўскую вобласьць ракетамі і ўдарнымі бесьпілётнікамі, паведаміў кіраўнік абласной вайсковай адміністрацыі Віталь Дзякіўніч.
Палтаўская вобласьць абвясьціла 5 і 6 траўня жалобу ў сувязі з гібельлю людзей у выніку расейскага ўдару, паведаміў Дзякіўніч.
У выніку расейскага нападу загінулі пяць чалавек — трое супрацоўнікаў нафтагазавай кампаніі і двое ратаўнікоў. Колькасьць параненых таксама павялічылася да 37 чалавек.
Раней міністар унутраных справаў Украіны Ігар Кліменка паведаміў пра гібель двух ратаўнікоў у выніку паўторнай атакі Расеі на газаздабыўны аб’ект у Палтаўскай вобласьці. Яшчэ 23 ратаўнікі атрымалі раненьні.
«Нафтагаз Украіны» паведаміў пра гібель трох сваіх супрацоўнікаў у Палтаўскай вобласьці.
Таксама расейскія войскі атакавалі Харкаў: ёсьць пашкоджаньні, людзі не пацярпелі, паведаміў мэр гораду Ігар Церахаў.
У Запарожжы праз расейскую атаку ў нежылым будынку ўзьнік пажар, паведаміў кіраўнік абласной вайсковай адміністрацыі Іван Фёдараў. Ён адзначыў, што ў выніку нападу пацярпела жанчына, ёй аказваюць дапамогу.
Расея амаль штодня атакуе Ўкраіну ракетамі, у выніку чаго разбураюцца цывільныя аб’екты, гінуць мірныя людзі. У ноч на 4 траўня ў шасьці прыфрантавых раёнах Украіны ад расейскай атакі загінулі чатыры чалавекі, больш за 60 атрымалі раненьні, паведаміла Ўкраінская служба Радыё Свабода.
Міністэрства абароны Расеі 4 траўня паведаміла, што Ўладзімір Пуцін аб’явіў перамір’е на 8 і 9 траўня, і выказала спадзеў, што Ўкраіна таксама спыніць агонь на гэты час. Вечарам 4 траўня прэзыдэнт Украіны Ўладзімір Зяленскінапісаў, што Ўкраіна не атрымлівала афіцыйнай заявы пра перамір’е, але абвяшчае рэжым цішыні, пачынаючы з 00:00 у ноч з 5 на 6 траўня.
У Маскве рыхтуюцца да параду ў Дзень Перамогі 9 траўня. У Міністэрстве абароны Расеі раней паведамілі, што калёны вайсковай тэхнікі ў сувязі з апэратыўнай абстаноўкай сёлета ня будуць удзельнічаць у вайсковым парадзе.
Чакецца, што праз актыўнасьць украінскіх бесьпілётных сілаў вайсковы парад на Краснай плошчы ў Маскве значна скароцяць або і зусім скасуюць.
Уладзімір Пуцін раней зьвярнуўся да Дональда Трампа з прапановай аб спыненьні агню на Дзень Перамогі, да ўкраінскіх уладаў ён з такой прапановай не зьвяртаўся.
Прэсавая служба Аляксандра Лукашэнкі 12 красавіка паведаміла, што ён пацьвердзіў свой удзел у вайсковым парадзе ў Маскве 9 траўня, гэта ён абмяркоўваў у размове з расейскім прэзыдэнтам Уладзімірам Пуціным.