Кіраўнік Нацыянальнага паралімпійскага камітэту Ўкраіны Валер Сушкевіч пракамэнтаваў дазвол спартоўцам з Расеі спаборнічаць на Паралімпійскіх гульнях пад дзяржаўным сьцягам.
«Я вельмі, вельмі злы і абураны дазволам спаборнічаць пад сваім сьцягам шасьці расейскім спартоўцам. Гэта жахліва, гэта эскаляцыя ляяльнасьці да прадстаўнікоў краіны-забойцы! Гэта несумленная гульня», — цытуе Сушкевіча sport-express.ua.
Пры гэтым спартовы чыноўнік падкрэсьліў, што Ўкраіна не разглядае магчымасьці байкоту Паралімпійскіх гульняў, каб ня даць агрэсару козыру на спартовай арэне.
«Калі мы не паедзем, гэта будзе азначаць дазвол Пуціну перамагчы ўкраінскіх паралімпійцаў, Украіну, выключыўшы нас з Гульняў. Гэтага ня будзе!»
ГЛЯДЗІЦЕ ТАКСАМА: Чацьвёра беларускіх спартоўцаў могуць выступіць на Паралімпіядзе-2026 зь дзяржаўнай сымболікайБеларусам таксама дазволілі выступіць пад сваім сьцягам на Паралімпійскіх гульнях 2026 году. Кіраўнік Міністэрства моладзі і спорту Ўкраіны Мацьвей Бідны ўжо пракамэнтаваў гэтую сытуацыю.
«Сьцягі Расеі і Беларусі ня могуць быць на міжнародных спартовых спаборніцтвах. Гэта сьцягі рэжымаў, якія ператварылі спорт у інструмэнт вайны, хлусьні і пагарды. У Расеі паралімпійскія віды спорту зрабілі падтрымкай для тых, каго Пуцін паслаў ва Ўкраіну забіваць, а яны вярнуліся з Украіны інвалідамі», — напісаў Бідны.
Бідны назваў гэтае рашэньне МАК «вялікай памылкай».
Раней паралімпійскія камітэты Польшчы і Літвы заявілі, што байкатуюць Паралімпіяду ў Італіі праз рашэньне МАК дапусьціць афіцыйныя сьцягі Расеі і Беларусі да выкарыстаньня на спаборніцтвах. Абедзьве арганізацыі яшчэ раз заявілі пра сваю падтрымку Ўкраіны.
ГЛЯДЗІЦЕ ТАКСАМА: Польшча і Літва будуць байкатаваць адкрыцьцё Паралімпіяды праз допуск беларусаў і расейцаў пад дзяржаўнымі сьцягамі