«У 23:18 праз гібрыдную атаку, якую ажыцьцяўляе Беларусь супраць Літвы, яе цывільнай авіяцыі і грамадзтва, пры фіксацыі ў рызыкоўных для авіяцыі зонах навігацыйных адзнак, характэрных для балёнаў, былі ўведзеныя часовыя абмежаваньні паветранай прасторы над Віленскім аэрапортам. Віленскі аэрапорт аднавіў дзейнасьць у 00:06, пасьля скасаваньня абмежаваньняў паветранай прасторы», — гаворыцца ў паведамленьні кампаніі Літоўскія аэрапорты (LTOU).
Абмежаваньні ў аэрапорце ў аўторак упершыню былі ўведзеныя ў 19:05, а паветраная прастора адкрыта ў 20:24. Пазьней абмежаваньні былі ўведзены паўторна ў 23:18.
LTOU паведамляе, што затрымкі асобных рэйсаў могуць быць і ў сераду праз парушэньне ратацыі экіпажаў і самалётаў.
- Як пісала агенцтва BNS, апошні раз з гэтай прычыны праца Віленскага аэрапорту была парушана 6 сьнежня мінулага году.
- Прылёты кантрабандысцкіх балёнаў зь Беларусі мінулай восеньню і зімой больш за дзесяць разоў уплывалі на працу Віленскага аэрапорта і адзін раз — Ковенскага.
- У сярэдзіне сьнежня ўрад Літвы праз кантрабандысцкія балёны, якія парушаюць працу Віленскага аэрапорту і ствараюць пагрозу цывільнай авіяцыі, аб’явіў экстрэмальную сытуацыю.
- Літоўскія палітыкі лічаць прылёты кантрабандысцкіх балёнаў гібрыднай атакай Менска.
Налёт кантрабандысцкіх балёнаў з Беларусі ў аўторак увечары быў самым інтэнсіўным сёлета: было выяўлена восем зондаў, кажа кіраўнік Нацыянальнага цэнтру кіраваньня крызісамі Літвы Вілмантас Віткаўскас.
«Важна адзначыць, што гэтая ноч, мабыць, была самай інтэнсіўнай за ўвесь гэты год, мы зафіксавалі на нашых радарах агулам 42 выпадкі», — сказаў ён у сераду ў этэры радыё LRT.
Паводле зьвестак кіраўніка Нацыянальнага цэнтру кіраваньня крызісамі, да раніцы было знойдзена восем кантрабандысцкіх балёнаў, затрыманыя чатыры чалавекі, таксама знойдзены рэшткі некалькіх балёнаў.
«Ідзе інтэнсіўная праца нашых службаў. Кінутыя вялікія сілы на тое, каб устанавіць тых, хто прыяжджае забіраць гэтыя пасылкі, і перадухіліць падобныя выпадкі ў будучыні, каб такія налёты, як гэтай ноччу, не паўтарыліся», — сказаў Віткаўскас.
Ён выказаў думку, што кантрабандысты актывізаваліся зь ведама рэжыму ў Менску.
Паводле Віткаўскаса, сёлета цягам шасьці дзён літоўскія службовыя асобы фіксавалі на радарах маркеры палёту кантрабандысцкіх балёнаў.
«Вядома, гэта не былі такія лічбы, як цяперашняй ноччу, гэта былі, магчыма, дзесяць-дваццаць выпадкаў, гэта сапраўды невялікая колькасьць, і яна зусім не ўплывала на бясьпеку нашай паветранай прасторы. Але гэтая ноч была выключнай, і аэрапорт быў закрыты», — сьцьвярджае Віткаўскас.
Паводле яго, у аўторак увечары праз прылёты кантрабандысцкіх балёнаў Віленскі міжнародны аэрапорт закрываўся тройчы.
З словаў кіраўніка Цэнтру кіраваньня крызісамі, гэта закранула больш за 1700 пасажыраў.
ГЛЯДЗІЦЕ ТАКСАМА: Польшча выклікала беларускага дыплямата ў адказ на ўварваньне паветраных балёнаўЗакрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы 27 кастрычніка 2025 году зусім закрыў мяжу зь Беларусьсю на месяц пасьля таго, як некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія ляцелі зь Беларусі, несучы цыгарэты.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- 10 лістапада Вільня зьвярнулася да Менску з просьбай дазволіць выезд грузавікоў сваіх кампаніяў у Літву. Менск адмовіў.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі і Салечнікі адкрыюцца з 20 лістапада. Перад гэтым прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней.
- Аднак пасьля таго як урад Літвы зноў адкрыў мяжу, Віленскі аэрапорт зноў некалькі разоў закрывалі з прычыны аэрастатаў зь Беларусі, а літоўскім фурам па-ранейшаму не даюць выехаць у Літву. Беларускі бок патрабуе ад Вільні пачатку палітычных перамоваў.