У выніку расейскіх абстрэлаў за апошнія 24 гадзіны ва Ўкраіне ёсьць загінулыя і параненыя.
У Бродах праз пажар на нафтааб’екце скасавалі заняткі ў школах
Украінская кампанія «Нафтагаз» паведаміла аб пашкоджаньні аднаго з сваіх аб’ектаў у горадзе Броды Львоўскай вобласьці.
У выніку пацэльваньня пачаўся пажар. Кампанія вымушана была тэрмінова спыніць тэхналягічныя працэсы, каб абараніць людзей і навакольле. У той жа час назву пашкоджанага аб’екту не ўдакладнілі.
Украінскія палітыкі заявілі, што расейскія войскі ўпершыню ўдарылі па нафтаправодзе «Дружба», празь які цяпер пастаўляюцца нафтапрадукты ў Вугоршчыну і Славаччыну. Праз моцны пажар і шчыльны чорны дым у горадзе скасавалі заняткі ў школах, а жыхарам раілі зачыніць вокны і без неабходнасьці не выходзіць на вуліцу.
«Транзыт нафты і дагэтуль дае Расеі мільярдныя прыбыткі, а Орбан (прэм’ер Вугоршчыны. — РС) і Фіца (прэм’ер Славаччыны. — РС) старанна адвакатуюць Маскве на Захадзе. [...] Расея працягвае генацыдныя практыкі, зьнішчаючы энэргетычную інфраструктуру, каб украінцы засталіся безь цяпла і сьвятла, цяпер, перад новымі маразамі, мэтанакіравана б’е па нафтатранспартнай інфраструктуры Ўкраіны. Колькі яшчэ ўкраінскі ўрад дазволіць Расеі атрымліваць мільярдныя прыбыткі ад транзыту? Калі бачым, што нафтаправод „Дружба“, на жаль, не зьяўляецца гарантыяй энэргетычнага ceasefire (спыненьня агню. — РС)», — напісала ў сваім Telegram-канале дэпутатка ўкраінскага парлямэнту Ірына Герашчанка.
Паводле яе, фракцыя «Эўрапейская салідарнасьць» на чарговай сэсіі будзе патрабаваць спыніць транзыт нафты ў эўрапейскія краіны.
ГЛЯДЗІЦЕ ТАКСАМА:
Некалькі гарадоў Украіны зноў засталіся безь сьвятла і цяпла. Расейскія ракеты ляцелі і над тэрыторыяй БеларусіУ Харкаўскай і Кіеўскай вобласьці ёсьць ахвяры расейскіх абстрэлаў
У Харкаўскай вобласьці расейскія войскі пацэлілі ў пасажырскі цягнік, які накіроўваўся ў Барвенкава Харкаўскай вобласьці. У ім ехалі 155 пасажыраў, а ў вагоне, куды пацэлілі расейцы знаходзіліся 18 чалавек. Сама меней пяць чалавек загінулі і два атрымалі раненьні. Цягнік атакавалі трыма дронамі.
У Белгарадцы Бучанскага раёну Кіеўскай вобласьці ў выніку ўдару дронамі па шматпавярховым жылым доме загінулі два чалавекі, яшчэ чатыры атрымалі раненьні. З пацярпелымі працуюць мэдыкі і псыхолягі.
ГЛЯДЗІЦЕ ТАКСАМА:
Пасьля расейскага абстрэлу дзясяткі параненых у Адэсе і Харкаве, пашкоджаныя царква, дзіцячы садок і школаАбстрэлы працягваюцца на тле маштабных пашкоджаньняў аб’ектаў энэргетыкі і цеплагенэрацыі, якія цяпер найбольш актыўна дапамагаюць аднаўляць міжнародныя партнэры Ўкраіны. Па ўсёй краіне дзейнічаюць пагадзінныя адключэньні і абмежаваньні магутнасьці паставак электраэнэргіі.
Расейская армія рэгулярна з розных відаў узбраеньня абстрэльвае ўкраінскія рэгіёны. Кіраўніцтва Расеі пераконвае, што не наносіць мэтанакіраваных удараў па цывільнай інфраструктуры і мірных жыхарах.
Украінская ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і заяўляюць, што Расея мэтанакіравана зьнішчае аб’екты крытычнай інфраструктуры і мірных жыхароў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.