Паведамляецца, што ў выніку гібрыднай атакі, зьдзейсьненай Беларусьсю, у небясьпечнай зоне былі заўважаныя навігацыйныя маркеры, характэрныя для паветраных балёнаў, і дзеля бясьпекі цывільнай авіяцыі, пасажыраў і насельніцтва паветраная прастора над Віленскім аэрапортам абмежаваная, піша Delfi, спасылаючыся на спэцслужбы дзяржавы.
«Службы кантралююць і аналізуюць рух навігацыйных маркераў і могуць прыняць рашэньне аб адкрыцьці паветранай прасторы наколькі мага раней — калі гэта будзе бясьпечна. Пасажыраў просяць сачыць за інфармацыяй аэрапорту і іхных апэратараў», — паведамляе Нацыянальны цэнтар кіраваньня крызісамі.
Перш было абвешчана, што абмежаваньне паветранай прасторы можа працягвацца да 20:05, аэрапорт закрылі а 19:05. Пазьней вымушаны перапынак падоўжылі да 22:05.
«Абмежаваньне паветранай прасторы падоўжана да 22:05. Службы шчыльна супрацоўнічаюць, і, калі сытуацыя зьменіцца, прастора можа быць адкрытая раней. Мы неадкладна паведамім вам пра гэта», — паведаміў цэнтар кіраваньня.
ГЛЯДЗІЦЕ ТАКСАМА: У Літве працягваюць разьмяшчаць сілы войскаў і памежнікаў для барацьбы з кантрабанднымі балёнамі зь БеларусіПраз пагрозы, што несьлі паветраныя балёны з кантрабандай тытуню зь Беларусі, праца Віленскага аэрапорту некалькі разоў прыпынялася ў кастрычніку, лістападзе і сьнежні 2025 года. Таксама былі перашкоды для працы лётнішча ў Коўне.
У кастрычніку ж, пасьля ўзмацненьня патоку балёнаў, урад Літвы абвясьціў надзвычайнае становішча па ўсёй краіне. Таксама былі закрытыя памежныя пункты пропуску «Меднікі» і «Салечнікі».
Каб разьвязаць сытуацыю зь перавозьнікамі, якія затрымаліся ў Беларусі, мяжу зь Беларусьсю адкрылі раней. Прэм’ер-міністарка Літвы Інга Ругінене заяўляла, што балёны амаль не фіксуюцца ў паветранай прасторы. Але выявілася, што нават пасьля адкрыцьця памежных пунктаў літоўскія фуры ня могуць так проста пакінуць тэрыторыю Беларусі. Акрамя таго, грузавікі прымусова адпраўлялі на платныя стаянкі. Калі ж літоўскія перавозьнікі зьвярнуліся да ўраду Літвы па дапамогу, Ругінене заявіла, што прэтэнзіі трэба выстаўляць беларускаму боку. Пытаньне дагэтуль цалкам не разьвязанае.
ГЛЯДЗІЦЕ ТАКСАМА: Польшча выклікала беларускага дыплямата ў адказ на ўварваньне паветраных балёнаў