На Курскай АЭС у Расеі ўспыхнуў пажар пасьля таго, як расейскія вайскоўцы зьбілі ўкраінскі бесьпілётнік, які ляцеў паблізу станцыі, паведаміла прэс-служба станцыі.
Інцыдэнт стаў адным зь некалькіх выпадкаў, пра якія расейскія ўлады паведамілі 23 жніўня, дрон упаў на дапаможны трансфарматар, што выклікала пажар, які быў патушаны, пацярпелых няма, гаворыцца ў заяве прэс-службы.
«Баявы бесьпілётнік (БПЛА), які належыць Узброеным сілам Украіны, быў зьбіты сыстэмамі супрацьпаветранай абароны паблізу Курскай АЭС», — гаворыцца ў заяве прэс-службы ў Telegram.
«Пасьля ўдару бесьпілётнік дэтанаваў, што прывяло да пашкоджаньня дапаможнага трансфарматара», — гаворыцца ў заяве.
Пацярпелых няма, але ў выніку выбуху магутнасьць трэцяга энэргаблёка станцыі была зьніжана да 50 працэнтаў, паведаміла прэс-служба.
Узровень радыяцыі на месцы і ў навакольлі не перавышаў норму, дадалі ў прэс-службе.
Неадкладных камэнтароў з Украіны не было.
За апошнія некалькі месяцаў Кіеў павялічыў колькасьць удараў бесьпілётнікаў у Расеі ў адказ на працяглыя напады Расеі на Ўкраіну. Ён сьцьвярджае, што атакі накіраваныя на зьнішчэньне інфраструктуры, якая мае вырашальнае значэньне для ваенных намаганьняў Масквы.
Пра інцыдэнт на Курскай АЭС упершыню згадаў расейскі фэдэральны тэлеканал REN TV. Ён паведаміў, што трансфарматар не зьяўляецца часткай ядзернай часткі станцыі, спасылаючыся на прэс-службу станцыі. Пакуль незразумела, у якой частцы станцыі адбыўся пажар.
Курская АЭС знаходзіцца ў 40 кілямэтрах на захад ад горада Курск, абласнога цэнтра Расеі, на беразе ракі Сейм. Першы блёк АЭС быў запушчаны ў 1976 годзе. Іншыя блёкі дадалі ў 1979, 1983 і 1985 гадах.
Міжнароднае агенцтва па атамнай энэргіі (МАГАТЭ) неаднаразова папярэджвала аб небясьпецы баявых дзеяньняў вакол атамных электрастанцый з таго часу, як Расея пачала паўнамаштабнае ўварваньне ва Ўкраіну ў лютым 2022 года.
Расея акупавала і незаконна кіруе Запароскай АЭС Украіны, дзе таксама адбываюцца ініцыдэнты, зьвязаныя з вайной.
ГЛЯДЗІЦЕ ТАКСАМА:
У МАГАТЭ заявілі аб артылерыйскім абстрэле паблізу пляцоўкі Запароскай АЭС і небясьпецы каля Хмяльніцкай АЭСВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.