Пасьля крытыкі Трампа на адрас Пуціна расейскае войска нанесла рэкордны ўдар па Ўкраіне ракетамі і дронамі

Расейскі самалёт МіГ-31К, абсталяваны аэрабалістычнай ракетай «Кінжал», ілюстрацыйнае фота

9 ліпеня расейскія вайскоўцы ўчынілі камбінаваны напад на Ўкраіну, выкарыстоўваючы аэрабалістычныя ракеты «Кінжал», крылатыя ракеты і сотні ўдарных бесьпілётнікаў. Асноўнымі цэлямі атакі былі Кіеўшчына і Валынь.

Расейскія войскі выпусьцілі па тэрыторыі Ўкраіны сем крылатых ракет, шэсьць «Кінжалаў» і 728 бесьпілётнікаў розных тыпаў, паведамілі Вайскова-паветраныя сілы Ўзброеных сілаў Украіны.

Усяго была зафіксаваная 741 паветраная цэль. Украінскія вайскоўцы зьбілі 7 ракет «Іскандэр-К», 296 бесьпілётнікаў, яшчэ 415 былі страчаныя або заглушаныя сродкамі радыёэлектроннай барацьбы. Асноўным кірункам удару была Валынь, горад Луцк.

«Сродкі паветранага нападу праціўніка былі падбітыя ў 4 месцах, а таксама падзеньне зьбітых было ў 14 месцах», — дадалі яны.

Жанчына атрымала раненьні ў Кіеўскай вобласьці ў выніку расейскага ўдару, паведаміла абласная вайсковая адміністрацыя.

«Жанчына 1980 году нараджэньня атрымала раненьні ў выніку варожага нападу ў Браварскім раёне. Зараз яна шпіталізаваная ў мясцовай лякарні. Папярэдні дыягназ — закрыты пералом грудной клеткі. Ёй надаюць усю неабходную мэдычную дапамогу», — гаворыцца ў паведамленьні.

Аднагадовы хлопчык загінуў у Херсонскай вобласьці ў выніку атакі расейскага бесьпілётніка, паведаміў кіраўнік абласной ваеннай адміністрацыі Аляксандр Пракудзін.

Мэр Луцку Ігар Палішчук назваў удар па Луцку «найбольш масаваным варожым нападам з выкарыстаньнем бесьпілётнікаў і ракет».

Рэакцыя Зяленскага

У ноч на 9 ліпеня расейскія войскі выпусьцілі найбольшую колькасьць паветраных цэляў над тэрыторыяй Украіны за адзін дзень — 741, заявіў прэзыдэнт Уладзімір Зяленскі, рэагуючы на новыя расейскія абстрэлы.

«Ужываліся нашыя дроны-перахопнікі — ёсьць дзясяткі зьбіцьцяў, мы маштабуем тэхналёгію. Працавалі і мабільныя агнявыя групы — таксама маем дзясяткі зьбіцьцяў. Дзякуй усім ваярам за трапнасьць», — адзначыў прэзыдэнт Украіны.

Паводле Зяленскага, у рэгіёнах Украіны ідзе ліквідацыя наступстваў начной расейскай атакі.

«Зараз у многіх вобласьцях Украіны працягваецца ліквідацыя наступстваў (...) Асноўны ўдар быў па Луцку. Пашкоджаньні зафіксаваны таксама ў Дняпроўскай, Жытомірскай, Кіеўскай, Кіраваградзкай, Мікалаеўскай, Сумскай, Харкаўскай, Хмяльніцкай, Чаркаскай і Чарнігаўскай вобласьцях», — удакладніў Зяленскі.

Ён зноў заявіў, што Расея адхіляе ўсе спробы дасягнуць міру і прыпыненьня агню:

«Чарговы доказ, што патрэбныя санкцыі — балючыя санкцыі супраць нафты, якая ўжо больш як тры гады вайны напампоўвае вайсковую машыну Масквы грашыма. Другасныя санкцыі супраць тых, хто купляе гэтую нафту і спансаруе забойствы. Партнэры ведаюць, як націснуць так, што Расея будзе вымушана думаць пра завяршэньне вайны, а ня новыя ўдары. Кожны, хто хоча міру, павінен дзейнічаць», — падсумаваў ён.

ГЛЯДЗІЦЕ ТАКСАМА:

Курскі губэрнатар заявіў, што пасьля атакі ўкраінскага дрону па гарадзкім пляжы загінулі тры чалавекі
  • Расейскія вайскоўцы рэгулярна з розных відаў узбраеньня атакуюць украінскія рэгіёны. Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірнае насельніцтва і разбураючы лякарні, школы, дзіцячыя сады, аб’екты энэргетыкі і водазабесьпячэньня.
  • Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.

ГЛЯДЗІЦЕ ТАКСАМА:

Трамп: «Пуцін нагаварыў шмат лухты», магчымыя санкцыі

Прэзыдэнт ЗША Дональд Трамп заявіў у аўторак на пасяджэньні свайго кабінэту ў Белым доме, што ён незадаволены расейскім прэзыдэнтам Уладзімірам Пуціным і разглядае магчымасьць накладаньня дадатковых санкцыяў на Расею ў сувязі зь яе нежаданьнем завяршаць вайну ва Ўкраіне.

З словаў Трампа, Пуцін «нагаварыў нам мноства ўсякай лухты». Амэрыканскі прэзыдэнт падкрэсьліў, што Пуцін паводзіць сябе зь ім «ветліва», але на практыцы гэта «ня мае ніякага сэнсу», бо, паводле Трампа, мноства людзей надалей гінуць.

На пытаньне, як Трамп будзе рэагаваць на апошнія дзеяньні Расеі, прэзыдэнт ЗША адказаў, што можа зрабіць «невялікі сюрпрыз». Ён дадаў, што вывучае законапраект аб новых санкцыях супраць Расеі, распрацаваны групай сэнатараў. Пры гэтым, з словаў Трампа, прыняцьце гэтага дакумэнту будзе залежаць ад яго думкі.

ГЛЯДЗІЦЕ ТАКСАМА:

У Пэнтагоне заявілі, што на загад Трампа накіроўваюць дадатковыя ўзбраеньні Ўкраіне