У Дзяржаўнай памежнай службе Ўкраіны не выключаюць імаверных правакацый з боку тэрыторыі Беларусі ў часе правядзеньня вайсковых вучэньняў «Захад-2025».
«Вядома ж, рызыка пагрозы павялічыцца, калі будзе праходзіць актыўная фаза вучэньняў, якія анансаваныя на верасень, але цяпер задача падразьдзелаў выведкі асачыць поўную інфармацыю аб тым, якія сілы Расея выкарыстае на тэрыторыі Беларусі ў часе гэтых вучэньняў, і, уласна, дзе яны будуць праходзіць», — паведаміў сьпікер Дзяржаўнай памежнай службы Ўкраіны Андрэй Дземчанка ў эфіры ўсеўкраінскага тэлемаратону.
Паводле яго, Расея, выкарыстоўваючы Беларусь, можа спрабаваць зрабіць розныя дзеяньні, у тым ліку, «нейкія дэманстрацыйныя» у кірунку нашай мяжы.
«Таму мы павінны нарошчваць свае абарончыя магчымасьці па лініі мяжы і ў памежжы, ствараючы фартыфікацыйныя ўмацаваньні, каб украінскія вайскоўцы мелі ўсе магчымасьці адбіць любыя атакі, якія такія адбудуцца з тэрыторыі Беларусі», — падкрэсьліў Андрэй Дземчанка.
На восень 2025 году ўлады Беларусі і Расеі рыхтуюць супольныя маштабныя вучэньні на беларускай тэрыторыі.
Летась у кастрычніку міністар абароны Беларусі Віктар Хрэнін назваў вучэньні «Захад-2025» «галоўнай падзеяй», да манэўраў плянуецца залучыць больш за 13 тысяч чалавек.
Сёлета ў чэрвені Віктар Хрэнін паведаміў пра прынятае рашэньне зьнізіць колькасьць удзельнікаў беларуска-расейскіх манэўраў «Захад-2025», а самі вучэньні перанесьці ўглыб беларускай тэрыторыі.
ГЛЯДЗІЦЕ ТАКСАМА:
Чакаецца вялікі летні наступ Расеі — ці зноў з тэрыторыі Беларусі?Расейскія войскі не зьмяншаюць інтэнсіўнасьць удараў па ўкраінскім памежжы
Андрэй Дземчанка заявіў, што цяпер Расея захоўвае інтэнсіўнасьць абстрэлаў памежных украінскіх тэрыторый — Чарнігаўскую, Сумскую і Харкаўскую вобласьці.
Паводле яго, для ўдараў расейскія войскі выкарыстоўваюць усе віды ўзбраеньня — дроны, артылерыю, а таксама баявую авіяцыю.
Прадстаўнік памежнай службы адзначыў, што на мяжы з Украінай у Сумскай вобласьці Расея сканцэнтравала прыблізна 50 тысяч сваіх вайскоўцаў, а таксама ў Харкаўскай вобласьці, спрабуючы расшырыць зону баявых дзеяньняў.
Улады Сумскай вобласьці паведамілі, што ў ноч на 24 чэрвеня трывога ў рэгіёне праз расейскія ўдары працягвалася больш за 13 гадзін.
У выніку абстрэлаў загінулі тры чалавекі, у тым ліку адно дзіця, яшчэ 19 атрымалі раненьні, у тым ліку 5 дзяцей. Шмат пашкоджаных прыватных будынкаў і цывільнай інфраструктуры.
У Харкаўскай вобласьці раненьні атрымалі4 асобы, у тым ліку 15-гадовая дзяўчына.
ГЛЯДЗІЦЕ ТАКСАМА:
Расейскія вайскоўцы нанесьлі ўдар па ліцэі ў Белгарадзе-Днястроўскім. Ёсьць ахвярыУ Кіеве завяршылі апэрацыю па пошуку загінулых у зьнішчаным пяціпавярховіку
Міністар унутраных спраў Украіны Ігар Кліменка паведаміў аб завяршэньні пошукавай апэрацыі ў Шаўчэнкаўскім раёне ўкраінскай сталіцы, дзе напярэдадні расейская ракета пацэліла ў пяціпавярховы дом.
«Расейская ракета 23 чэрвеня забрала жыцьці 9 чалавек. [...] На месцы ўдару працягваюцца аварыйна-аднаўляльныя працы — адмыслоўцы дэмантуюць небясьпечныя канструкцыі», — удакладніў міністар.
Паводле ўладаў Кіева, у выніку расейскага ўдару па Шаўчэнкаўскім раёне пацярпелі 26 гараджан, а ўсяго па Кіеве 36 чалавек атрымалі траўмы рознай ступені цяжкасьці.
Расейскія войскі рэгулярна абстрэльваюць Украіну з розных відаў узбраеньня — ударнымі дронамі, ракетамі, кіраванымі авіябомбамі.
Кіраўніцтва Расеі зьняпраўджвае тое, што расейская армія наносіць мэтанакіраваныя ўдары па цывільнай інфраструктуры і мірным насельніцтве.
Украінская ўлада і міжнародныя арганізацыі кваліфікуюць гэтыя ўдары як ваенныя злачынствы Расейскай Фэдэрацыі і пераконваюць, што яны маюць мэтанакіраваны характар.
ГЛЯДЗІЦЕ ТАКСАМА:
Расея ўначы зноў атакавала ўкраінскія гарады. У Кіеве абрынуўся пад’езд 5-павярховіка. ФОТАВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.